入行12年的陳豪終於榮膺視帝，事業雖然有成，但仍未公開自己的感情世界，每次提起緋聞女友廖碧兒，內斂的他只會儍笑三聲，不過他也透露想盡快結婚生仔，可能由於父親在他小時候就過身，故令陳豪更想過溫馨家庭生活。 撰文：王崇穎
陳豪今年終於憑劇集《溏心風暴》躍登07年視帝，還連奪我最喜愛男主角獎。對於當晚大批fans在電視城外守候，以及fans一直為他所付出的點點滴滴，陳豪自言銘記於心。
由奪獎到現在，陳豪表示未有時間好好慶祝，以往3次提名都名落孫山，現在終於成為雙料視帝，他坦言得來不易，他日前說：「其實我真正積極起嚟都係呢兩年，以前只會抱住明天嘅事明天先算嘅心態，但呢兩年發生咗唔少事，當然有開心有唔開心，我開始覺得自己時間唔多，所以開始珍惜身邊嘅嘢，唔想好似以前咁只係停留喺同一個點上。」
最想影視雙飛
拍電影出身的陳豪經過多年起跌，當年拍電影《晚九朝五》時憑高大型仔迷倒不少OL，可惜機會未有再降臨，往後幾年吃過不少苦頭，他說：「嗰時拍電影試過半年冇工開，只係間中做吓模特兒，拍完第一部電影先發覺自己對做戲原來好有興趣，但因為市道唔好，運氣又唔好，嗰時希望追求演技上嘅進步已經太遲，好彩喺機緣巧合下，00年加入咗無綫，令我得到喺電影方面得唔到嘅機會。」
問陳豪電影和電視那方面較有滿足感？他說：「其實係兩樣嘢，電影好靠個導演，電視真係靠自己，如果要過足戲癮就一定係電視。喺我嚟講，我希望兩者都可以做到。」
發掘喜劇潛能
加入無綫後，陳豪擔正第一男主角，他說：「好彩公司對我嘅信任仲大過我自己，畀我去試好多唔同角色，由早年嘅《妙手仁心》到《洛神》，再到後期拍《絕世好爸》，係我入行3個好重要嘅時期。不過真正令我轉型嘅係《絕世好爸》，嗰時先知自己可以拍搞笑戲，之後公司就安排我拍《秀才遇著兵》，令觀眾認識到我嘅另一面。」
入行多年，陳豪的緋聞寥寥可數，來來去去也是圍繞廖碧兒的名字，每次問到這段緋聞，他只有一個反應，就是「哈！哈！哈！」。雖然如此，陳豪卻承認自己是傳統男人，他說：「我本身好傳統，將來一定結婚生仔，因為我好鍾意家嘅感覺，雖然爸爸喺我好細個時就過咗身，但我記憶中，佢同媽媽嘅感情好好。我都好有信心將來係個好爸爸，至少會畀仔女更多父愛。」
討厭虛榮女子
對於結婚對象，陳豪直言很簡單說：「我好希望對方同我一樣鍾意思考，最憎貪慕虛榮嘅女仔，完全感覺唔到佢哋會有內在美，我更加唔會用銀彈攻勢追女仔。我𠵱家唔可以話我要喺幾多年之後結婚，但就相信唔會好耐，因為我唔想到五、六十歲先去做老竇，到時候想陪個小朋友出去玩都無能為力。」
攝影：陳順禎
