羅霖教仔因材施教，讓孩子快快樂樂成長。這位傳統媽媽最重視三子的品德禮儀，囝囝不聽話，羅霖便罰他們看由她主持的餐桌禮儀節目，看足一小時，直至「入晒腦」為止！
羅霖與劉坤銘育有三子，大仔Nathan、二仔Jordan和孻仔Jonathan。大哥Nathan不想曝光，所以採訪當日三缺一，羅霖說：「大仔今年11歲，有時都幾內向怕醜，好多嘢都收收埋埋，所以我會鼓勵佢大膽啲、多啲畀佢做決定。Jordan今年9歲，比較懶散，我要對佢嚴格啲。」
Jordan愛玩愛笑，卻十分怕死，身為虔誠基督徒的羅霖笑說﹕「基督徒係要清楚自己信仰之後先可以受洗，不過Jordan好驚會落地獄，於是成日話自己已經係基督徒，我同佢講：『只要你聽話，心地善良孝順父母，主一定會保祐你！』」
三兄弟要團結
羅霖教小朋友絕不用體罰，反而着重因材施教，絕招是罰小朋友重看由她主持的禮儀節目。羅霖表示：「我希望佢哋可以做個有用嘅人，唔係要做大生意，總之只要養得起自己就夠，有剩餘嘅就要幫助有需要嘅人，所以我係重視小朋友嘅品行多過學業，特別係餐桌禮儀，如果佢哋一唔記得，我就會罰佢哋睇之前我幫有線主持嘅餐桌禮儀節目，睇足一個鐘，好似罰佢哋面壁咁，總之佢哋食飯嗰陣唔聽話，我一提起個節目佢哋就會記得，乖乖哋聽話。」
幼子年紀小，羅霖着重要三兄弟團結，她說：「我會同佢兩兄弟講，將來爸爸媽媽老咗，就要靠你哋照顧細佬。我仲叫兩個哥哥幫細佬改名，Jonathan呢個名就係將兩個哥哥嘅英文名夾埋一齊，係佢哋上網搵嘅。」
採訪：吳佩思 攝影：陳順禎
場地：Venture
