聖誕節要開好玩派對，一齊在靚靚廚房玩「煮飯仔」，確實比起着睡衣、穿校服的Party過癮好多，睇睇邊個廚藝高超、邊個雞手鴨腳都夠好笑！就如這天敢言出位的港姐袁彌明、IndieBand「RedNoon」、新人歌手張苡澂，夾錢租個靚廚房搞Party，原來有人拋鑊、焗雞樣樣得，亦有人洗隻帶子都問點搞，蝦碌與笑料齊飛！每人幾百蚊就得到真正快樂聖誕，大家要唔要試吓？
記者：廖秀娟
攝影：譚盈傑
服裝：DoubleBrother、React、DEEM（RedNoon）
Hair：Louis@ChinG.（RedNoon）
Ritz@HipHairCulture（張苡澂）
廚藝指導：黃文焯師傅@TowngasAvenue（23672713）
浴缸洗火雞都得
廚房搞派對本來不容易，即使有大大個廚房，亦未必有好設備，就算萬事俱備，誰膽敢借出廚房做戰場，任人魚肉？幸好有些餐廳、烹飪學校，有廚房出租服務，讓廚藝了得之人有表演「舞台」！
袁彌明、RedNoon及張苡澂提起開廚房派對，個個雀躍，煮得兩味的袁彌明（Erica），以前都試過搞自煮派對；而RedNoon的Bass手阿豐更加兩眼發光，「我以前正式學過廚，租廚房開派對梗係好啦，好似呢個廚房有大焗爐同攪拌機，設備齊全，可以大顯身手呀！」其他幾個隊員亦七嘴八舌，「最好係食完唔使自己洗碗同執枱㖭！」
初哥高手齊表演
今次派對場地有齊十多款菜譜任揀，煮得之人可以一手包辦，初哥亦可請餐廳廚師洗切準備好材料，根據提供的食譜照做。Erica及阿豐挑戰難度，做要包酥皮的威靈頓牛柳及釀火腿火雞卷；RedNoon其餘三子和張苡澂試煎鵝肝、焗帶子，雞手鴨腳，個個各展所長，娛樂性媲美《美女廚房》，最重要煮完「拍拍籮柚走得」，大家同聲高呼：「聖誕快樂！」
燒蜜味火雞卷釀火腿配金巴利汁
時間：25分鐘
4人份量
聖誕沒火雞就不是聖誕餐，但十磅八磅一隻雞，煮又難食又難，今勻的火雞卷，煮得輕便，食得簡便過癮。
材料
火雞胸1個、煙有骨火腿120克、百里香3克、金巴利汁（CranberrySauces）20毫升、鹽/黑胡椒碎/牛油少許
做法
1.火雞放在雪櫃下格自然解凍一日，以水略冲洗，用鹽省勻全身，再冲水後抹亁。以刀起雞胸肉及起筋，並將胸肉𠝹開攤成薄片。
2.雞胸肉鋪在掃了牛油的錫紙上，撒上黑胡椒及百里香葉，再放上切成條狀的有骨火腿並捲好，放入已預熱焗爐，以180度火焗15分鐘。
3.打開錫紙，將雞胸肉切成一片片，伴以金巴利汁便可上碟。
貼士
火雞解凍不能心急，切勿以水洗或微波爐解凍，否則肉會「嚡」。想烤得入味，除胸肉要𠝹薄，還可在肉扒拮窿。
香脆蟹餅配士多啤梨他他汁
時間：15分鐘
2人份量
蟹餅需要點工夫又不太難做，味道又香口、鮮味，朋友會欣賞的！問題是最好有個朋友幫手拆蟹肉便Perfect！
材料
鮮蟹肉50克、洋葱碎5克、芫荽碎2克、沙律醬/麵粉各3克、蛋漿1隻、麵包糠60克、雜沙律菜20克、紅車厘茄1粒、士多啤梨他他汁5克
做法
1.蟹肉混合洋葱、芫荽碎、沙律醬和40克麵包糠，分成4份後搓成圓餅狀。
2.順序沾上麵粉、蛋漿及麵包糠，以中火煎至金黃色，放在有雜菜和車厘茄的沙律上，伴以士多啤梨他他汁即成。
貼士
蟹餅材料混入麵包糠，不怕蟹肉出水，否則材料要亁身，唔係蟹餅煎唔成㗎！
燒羊架配馬得拉燒汁
時間：35分鐘
2人份量
香草芥末燒羊架是聖誕餐的常見高級食物，易做又好味！做得好，人家以為你廚藝了得㗎！
材料
羊架1個、蒜茸13克、新鮮迷迭香5克、芥末醬5克、原粒芥末醬5克、橄欖油5毫升、鹽/黑胡椒各少許、意大利馬得拉酒（Marsala）20毫升、燒汁50毫升、亁葱碎3克
做法
1.切碎迷迭香混合10克蒜茸、芥末、原粒芥末醬、橄欖油、鹽及黑胡椒，醃羊架3小時。
2.預熱焗爐，以180度焗15分鐘後待凉5分鐘。
3.其間起鑊炒香亁葱碎及3克蒜茸至金黃色，倒入馬得拉酒，待酒精揮發後，再放入燒汁煮5分鐘，淋上羊架便可享用。
貼士
兩款芥末醬皆用法國Dijon出品，味道不太強烈，與羊扒最配合。
蒜茸香草醬芝士焗帶子配雜菜沙律
時間：10分鐘
1人份量
非常易做又香口的前菜，最適合不懂最菜的朋友用來充撐場面，人人都可以出力啊！
材料
有殼帶子1隻、沙律菜20克、橙色車打芝士10克、香草醬Pesto5克、紅車厘茄1粒、意大利橄欖油/黑醋汁各5毫升
做法
1.帶子連殼煎至金黃色，鋪上車打芝士，入180度焗爐焗3分鐘。
2.沙律菜撒上橄欖油、黑醋汁及香草醬，伴以紅車厘茄即可食用。
貼士
帶子不宜煮得太熟，否則肉會韌。
聖誕節廚房租用價錢TowngasAvenus
地區：尖沙嘴
價錢：$3,600/小時，最少3小時（包括材料、材料洗切、用餐時侍應服務及廚房清潔）
人數：最多20位
時限：24、25、26及31日晚飯時段分兩節：5pm-8pm或8pm-11pm，可訂一節或二節。
查詢：23672713（訂前問清楚使用細節，例如採用餐廳或是自己的餐單，會影響收費。）
租用其他靚廚房
雖然聖誕期間大部份廚房都已租出，但先了解租賃詳情，日後隨時用得着。
香港專業廚藝學院
地區：九龍城
廚房價錢：$500/小時（第一、二小時），$450/小時（第三、四小時），最少2小時（不包括材料、清潔及導師，清潔費另加$500）
貴賓房價錢：$500/2小時
人數：最多14位
設備：明火雙頭爐2組、蒸爐、大焗爐等
查詢：23360650
（租用前必須先議定所有細節）
Built-in舖
地區：銅鑼灣
價錢：$1,000/小時（不包括材料、清潔及導師，必須自己清潔）
設備：明火、電磁雙頭爐多組、電子焗爐、電炸鍋、電蒸爐、電子微波焗爐、智能雪櫃等
查詢：35280388（租用前必須先議定所有細節，人數及設備使用會有所限制。）
