隊長同船長係同一個英文字，船長係一船之首，隊長係球隊之首。喺英國球壇戴上隊長臂章係莫大榮譽，若當上國家隊隊長更係光宗耀祖；可惜，現任英軍隊長泰利懷疑受性醜聞所累，有傳足總會迫下任主帥改選隊長。覬覦此位多時嘅謝拉特，預期會好似前晚喺歐聯作客馬賽入第1球咁，成功執雞！
謝拉特勢接任英隊長
前任領隊麥卡倫掌舵期間，車路士中堅泰利幾乎喺毫無爭議下，擊敗「雙特」贏得隊長榮銜。然而早前爆出夜店狂歡醜聞、涉嫌「黃狗射尿」嘅泰利，即時英名盡喪；據講英足總認為隊長應該以身作則，該醜聞有損英軍形象，並準備喺下周三開會決定建議係咪褫奪其隊長資格，但最終決定權在新帥手上。泰利之前力撐摩連奴教英軍，我求大俠諗諗吓發覺好似別有用心。
回顧對上幾任英軍隊長，連尼加、舒利亞到碧咸，除咗柏列，個個都光榮卸任；今次泰利「丟架」之餘，亦可能成為近代英軍最「短命」隊長。同佢一齊玩開、踢開波嘅隊友，未必認同佢係「最短」隊長，但無論新帥誰屬，英軍來年2月6日友賽瑞士，應會畀足面碧咸，等佢喺自己第100場國際賽戴上隊長臂章。
此時，球迷必心生疑問：「如果泰利冇得做，邊個做？」查實國家隊候選隊長嘅選擇唔多，利物浦隊長謝拉特、車路士中場林柏特係大熱，前者今季演出悅目，周二晚歐聯率領球隊大勝晉級；後者近季表現平穩，乃不可或缺之重臣。冷馬方面，盛傳會繼承加利仔當紅魔隊長嘅朗尼，可能突然跑出。
卡比路周三面試
講開英格蘭，當然要講埋新帥最新動向。英國行家言之鑿鑿話意大利教練卡比路，會喺周三向英足總報到面試，內容包括英球壇毛病同國家隊隊長等；國內兩大教頭費格遜、雲格甚至開聲叫足總扑槌要卡比路云云。1.73倍嘅上馬賠率，熱得有理！