「國泰航空香港國際賽」，今年香港成績幾好，千二米短途錦標包辦冠亞季殿，千六米香港一哩賽得第一，二千米香港亦得第二，證明香港中短途賽事，係世界一流水準，阿聯酋嘅「高多芬」集團成績都好啫，得二千米賽事冠軍與千六米亞軍，以後好有信心每年到香港㩒「ATM」攞獎金。不過香港亦有最失望之人，就係何鴻燊與四太，佢哋一心入場捧盃，與頒獎嘅曾特首影番張相，聽吓警察銀樂隊奏國歌，誰知大熱門「爆冷」嘅騎師靳能，走位唔醒目，畀戴圖理隻馬「威滿蹄」搶咗條直線，苦追之下仍然輸半個馬位，雖然立即抗議，不成立吖。電視鏡頭立即對住何生與四太，兩人失望之情，溢於言表。
一位馬迷好心水清咁話：「何生輸馬，有益香港㗎，曾特首倡議香港成為伊斯蘭金融中心，須帶團去訪問杜拜等地；𠵱家就好咯，阿聯酋嘅『高多芬』贏香港盃，由曾特首頒獎，以後曾特首去探訪人哋，用賽馬打開話題，展開賽馬外交，對吸引中東油錢嚟香港，大有幫助！」咁都俾佢諗得到，服晒！
去年香港盃冠軍「爪皇凌雨」係七歲馬，睇落已經退晒步，今場冇段好睇，既然已同馬主贏咗七千五百萬元獎金，乜嘢榮譽都攞齊，應該返澳洲過退休生活咯，馬主練馬師無謂再逼隻老馬出賽吖。
大賽完畢後，警察銀樂隊表演，蘇格蘭風笛吹得非常好聽，相信會係亞洲最好嘅蘇格蘭風笛隊。英國人走咗，估唔到留下呢份文化「遺產」，啲外籍觀眾與馬迷料不到香港有如此「英國風」，大拍手掌。表演樂曲一收，馬場熄燈，烽火滙演隨之而至，成萬馬迷仲未走，一於近距離睇煙花，好過年初二晚去維港兩岸人逼人。
盛事過後，下一回高潮就係三月打吡，跟住奧運馬術籌備工作進入緊張階段，壓力好大。奧運馬術雖有馬會全力支持，但因為係國家大事，非香港特區之事，特區政府擔當不起有任何錯失，故此對有馬匹流感出現之澳洲防範嚴密，澳洲馬仍然不准運港，馬主急到跳起亦冇用。