世事嘅嘢好難預計，好似前日小妹先搭完威尼斯人集團旗下新開嘅金光飛航，由香港去澳門氹仔碼頭，噚日就話停航。金光飛航惹上官非突然要停航，話說早前有意營運呢條航線嘅香港西北航運快線，不滿航線經營權未有公開招標，入稟澳門法院，要求唔好接納政府批准金光飛航開航。
畀咗錢買船飛咁點先？金光飛航嘅靚女公關Kitty話，所有買咗船票嘅顧客可以到上環信德碼頭嘅金光飛航售票處退番晒錢，或者保留船飛，等單官司完咗，金光飛航復航再搭番船去氹仔（查詢：23599990）。但單官司幾時搞掂，Kitty都唔知。小妹覺得攞番錢穩陣啲，可以改搭賭王嘅船去澳門，再唔係，咪幫趁新渡輪囉！
逢周一至周四刊出