近排係球迷買親國際米蘭都有斬獲，佢哋周日又主場大炒拖連奴4:0派錢，加上阿仙奴嗰邊啱啱輸畀米堡，令到國米成為4大聯賽入面，唯一一支喺聯賽未輸過嘅球隊，威爆！冇咗費高同史坦高域唔緊要，因為有新「財神爺」占美尼斯照住嘛，求佢啦！「得到佢睇起你，你有『錢』途！」
另一隊米蘭市球隊AC輸死人，算數！因為我哋仲有國米派錢。智利小將占美尼斯近期「弗」爆，近4場賽事入咗3球，絕對係幫到上盤客嘅「財神爺」。養緊傷嘅費高同史坦高域你哋小心啲喇，占美尼斯又係擅於喺邊線發難嘅球員，就算你哋好番都未必有正選踢㗎！
占美尼斯當「弗」如派錢
占美尼斯當「弗」如派錢
睇番場波除咗贏到錢開心之外，原來背後都有個溫馨嘅故仔。話說國米今季將列高巴外借至拖連奴，呢場波都算叫做倒戈。拖連奴教練路禾連奴都好識做，畀列高巴喺65分鐘後備入替，等佢可以接受聖西路主場球迷嘅歡呼聲，場面都幾感人㗎。
賽後列高巴直頭入埋國米嘅球員更衣室同「隊友」傾偈，十足返咗屋企一樣，好簡單易明啫！雖然列高巴暫時外借到拖連奴，但係佢體內流緊嘅仲係「藍黑色」嘅血！鬼咩，列高巴嘅10萬鎊周薪曾經係全球最高人工，邊個先係真正老細佢自己知嘅。
列高巴接受歡呼感人
仲有呀，大家都知國米主席莫拉堤好錫列高巴，直頭當晒契仔咁看待，睇佢賽前特登同列高巴講：「好希望今晚見到你落場！」就知列高巴永遠都係「國米人」啦！