問小朋友︰「聖誕老人要符合甚麼條件？」他們說︰「肥嘟嘟、紅噹噹、慈祥、早午晚都派禮物……」小朋友天真易滿足，但要攞正牌當個正宗聖誕老人絕不簡單，須知聖誕老人可不後生，要長期keep住300磅，要上course攞Cert，要在氣溫高達攝氏十幾二十度下忍受大紅絨毛褸嘅迫人熱力，要俾小朋友亂搞鬍鬚都唔發老脾……點忍得？要對小朋友愛心爆棚先至得。
記者︰劉昱蘭
攝影︰陳陶鈞、陳盛臣、王文忠
Model︰Joey、Hely、Henry、Sherie、Irene
北極老人攞正牌
不單止鬍子真、肚腩真，連聖誕老人畢業證書都係真㗎！來自加拿大的SantaKevin，7年前喺北美聖誕老人學校VictorNevavaSantaSchool畢業，佢話各位老人同學真係日日要着聖誕老人衫返學，又要讀兒童心理學、化妝、演戲、點樣應付傳媒等。就算考試都要做一場show，一班大人考官會扮小朋友等你𠱁，睇你對小朋友嘅態度合唔合格，氣氛搞得好唔好。課程聽落幾密集，咁個course要讀幾耐呢？吓？原來3日就搞掂！雖然時間短，但都會有老人畢唔到業㗎，因為佢哋對小朋友唔夠愛心爆棚囉，要爆棚到好似SantaKevin咁︰「試過有個BB嘅小手指纏住咗我啲鬍鬚，仲亂郁扯到我好痛，但我都要好溫柔咁慢慢拎番隻手出嚟，無論幾痛，都要對小朋友仁慈。」
現實中，SantaKevin早已有3個孫仔，11、12歲人仔仍然相信Kevin係聖誕老人的好助手。Kevin仲透露雖然聖誕老人好鍾意紅色，但喺屋企或出街絕不能穿紅衫，就算係T-shirt，都會吸引到一大班鄰居街坊走埋嚟合照。
老人花生騷
700歲老人愛DoubleChocolateCookie
難得SantaKevin從北極（佢話加拿大都係喺北極圈喎）飛到香港金鐘太古廣場，小朋友一見到聖誕老人就急不及待話有好多問題要問，好想知老人的平常生活。
Q︰聖誕老人你幾老呀？
A︰我今年700歲喇。
Q︰嘩！你啲鬍鬚係真㗎﹗
A︰唔止鬍鬚，連頭髮同肚腩都係真㗎！
Q︰你最鍾意食乜嘢？
A︰最愛係DoubleChocolateCookie。
Q︰你咁忙，咁啲時間點分配呀？
A︰我有11個月準備聖誕節嘅來臨，我有個特製嘅陀錶，去到一個地方就將時間擰去嗰度，例如我𠵱家喺中國就指住China囉，咁我就有1小時喺中國派禮物。
Q︰咁你坐乜嘢車去唔同地方㗎？
A︰我有一架鹿車，有9隻鹿仔拉車，佢哋係Dasher（猛衝）、Comet（彗星）、Cupid（丘比特）、Dancer（舞者）、Prancer（跳躍）、Vixen（雌狐）、Donner（雷）、Blitzen（閃電）和Rudolph（狼）。
Q︰香港啲屋冇煙囪，你點入去派禮物呀？
A︰我有一條MagicKey，可以開到任何門鎖，不過要聖誕當日先可以用。
聖誕老人忙啲乜？
金鐘1,700呎大屋
SantaKevin喺香港嘅1,700呎大屋，有齊書房、飯廳、客廳、工作間等，如果想參觀，由即日至12月25日，到金鐘太古廣場，付$60（包4人）嘅入場費就得喇。
港產老人 講中文擘一字馬
始終聖誕老人要洋人扮先有說服力，但識講中文，同小朋友溝通到最重要，所以英籍老人David喺香港當了10年聖誕老人，fans多多，佢話香港同老家英國嘅小朋友好唔同：「英國嘅小朋友行埋去聖誕老人身邊，唔止影張相，仲會同你傾偈，講吓佢今年有幾乖，講吓聖誕願望同想要嘅禮物。香港就好有時間壓力，幾個家庭會同一時間衝埋嚟影相，都唔知應付邊個好。」雖然好多人鍾意聖誕老人，但都有可惡的一群︰「試過有小朋友扯開我啲鬍鬚再放手，啲鬚彈番落塊面，搞到我好痛，因為唔可以發脾氣，所以只可同佢講"HaHa,nopresentforyouthisyear"。」
老人現真身
唔係每個聖誕老人都係咁肥嘅，apm商場嘅SantaSteven就係瘦版老人。要由瘦變肥，當然要做點手腳，除了要着紅色T-shirt打底外，仲要有假狗裝身。
