【上海直擊】
日本女星酒井法子、台灣名模林志玲、莫文蔚、桂綸鎂、李準基同周渝民（仔仔），前晚喺上海出席2007風尚大典頒獎禮，現場星光熠熠，一子之母嘅伊能靜博到盡，唔怕冷賣晒大包，硬撼露背蛇腰嘅林志玲。
同樣係媽咪級嘅酒井法子亦保養得宜，佢早期主演嘅日劇《同一屋簷下》深入民心，獲大會頒發經典人物致敬獎，佢行紅地毯時大受歡迎，更應記者要求放慢腳步畀佢哋影相。
早前有傳酒井同老公高相祐一婚姻亮紅燈，前晚佢否認婚變，仲話自己要學識平衡家庭同事業。
酒井法子9月訪京時曾表示，章子怡同北京烤鴨都代表中國文化，佢前晚又話：「中國文化非常高深，對於中國的了解好像都是吃的多一些，這次來上海，我又多了大閘蟹。」
李準基：我愛你們
韓國男星李準基獲頒韓國藝人獎，佢行紅地毯時，有影迷唔顧危險爬樹影相，險象環生，李準基用普通話話：「我愛你們。」又用手指做出心形圖案，冧爆影迷。
至於失戀嘅陳慧嫻決心再戰樂壇，佢話：「我會比新人更努力，要放下一切，把每天獻給音樂，我還會嘗試演戲。」佢仲話新歌搵咗舊愛區丁玉做監製。
風尚大典部份得獎名單
經典人物致敬獎：酒井法子、鍾鎮濤
全球華人貢獻獎：汪明荃
經典音樂組合獎：草蜢
演員獎：周渝民、桂綸鎂、黃秋生、梁洛施
傑出歌手獎：莫文蔚、古巨基
韓國藝人獎：李準基
日本藝人獎：Gackt
星光大道獎：廖碧兒
香港歌手獎：黃耀明、Twins
資料來源：風尚大典大會