之前為咗參加《舞動奇跡》學跳拉丁舞嘅楊思琦，最近獲邀演出本月20同21號舉行嘅「舞動全球LatinSuperStarLiveinHongKong2007」，噚日佢着住桃紅色裙喺尖沙嘴出席記者會。
大會安排世界拉丁舞冠軍嘅Bryan同Carmen教思琦跳拉丁舞，跳呢種舞，男女難免有身體接觸，就好似思琦同Bryan跳嗰part舞，佢哋第一次見面，就有好多貼身動作，除咗攬腰外，又有被拉高腳呢啲舞步，所以見思琦都有啲尷尬，但都好專業咁完成動作。
拜師學藝
最後思琦拜師學藝送咗筆同玉璽畀兩位師傅，師傅就送番件好性感嘅拉丁舞裙回禮，思琦話：「今次好榮幸有兩個世界級嘅導師教我，我會跟佢哋學跳舞，如果及格嘅話，到時就可以着住呢件拉丁舞衫表演。」
問思琦跳舞時係咪有啲尷尬，佢話：「我只係冇心理準備，因為大家冇夾過，又係第一次見面。不過跳舞時就會豁出去，唔諗呢啲。」記者提議佢同男友李永豪一齊學，思琦話：「我係初學者，如果個拍檔帶到我就最好，兩個都唔識就難學。」
