自從香港市道變得暢旺，唔少嘢都話要加價，就連朝早落街嘆杯奶茶同菠蘿油，都要畀多幾蚊雞！呢股加價風潮，仲話咁快就吹到去汽車市場。首先話要加價嘅就係Toyota，早前收到風話佢哋會將08年製嘅車系作出價錢上嘅調整，例如Camry咁，行政版嘅新售價係$214,710，而卓越版則為$261,240，聽聞跟住其他車系都會陸陸續續咁加價㖭，所以話如果想買車嘅，家吓唔郁手仲等幾時？
另外一個話加價嘅就係MINI，聽佢哋嘅市場部大員講，話因為歐元滙價日日係咁升，搞到佢哋喺嚟緊08年要將旗下車款嘅售價調高，而且仲要加5%或以上，以新到港嘅Clubman賣$277,000為例，如果加價5%的話，差唔多要30萬先有交易，計落都真係唔少喎！之但係咁，佢叫我提提大家，就係話如果想用現有嘅價錢喺年底前做MINI車主嘅話，就真係要趁快啦！
記者：車報員