想成功開拓日本遊戲市場，單靠射擊或動作類型固然唔足夠，始終要搵隻醒神RPG做鎮山之寶，因此經歷過上代主機失敗嘅微軟，一早Mark定「FF之父」坂口博信幫佢製作兩隻超大作嚟護航。《藍龍》舊年面世嗰陣獲得不俗評價，有望成為完美三部曲，如今另一重頭戲《LostOdyssey》亦率先抵港，唔Buy《龍珠》風格嘅機迷都仲有得享受《男兒當入樽》嗰類鬥智鬥力嘅場面，絕對啱晒井上老師Fans！
撰文：陳福榮
漫畫遊戲班底齊出動
當坂口博信高調宣佈以兩大RPG嚟支持微軟嗰陣，已擺明車馬係朝住《DQ》同《FF》而來，前作《藍龍》的評價雖毀譽參半，但贏得唔少XB360支持者掌聲。到咗另一隻極有《FF》色彩嘅《LostOdyssey》面世，幕後班底仲包括《FF》系列御用作曲家植松伸夫、著名作家重松清及CG部份的本廣克行。當然不得不提《男兒當入樽》井上雄彥做人設，冇佢嘅獨到筆觸又點會整到男主角凱姆嗰種滄桑感呢？
頭目戰鬥智鬥力
可能系出名門所致，《LO》喺頭目戰度花咗唔少心思，大部份決鬥都唔係齋斬齋劈算數，比如最初嗰架火炮戰車，原本Demo版亂打都可以輕易取勝，不過𠵱家就變成左右兩支炮輪流啓動防禦裝置，必須順序逐個回合轉換嚟打，而且之後嘅波士都有類似玩法，唔適得其法任你幾高Level都冇用。不過咁，對於唔慣玩RPG嘅朋友又唔使擔心，皆因假如打咗一陣都搵唔到竅門，電腦係會畀若干提示你，咁就可以放心過關啦！
善用指環事半功倍
鑑於指令式RPG往往讓人產生缺乏互動性嘅感覺，時下唔少作品都陸續加入小玩意，例如《Beatmania》因應適當時機按掣，唔使好似《DQ》咁不停揀怪獸嚟攻擊咁乏味。至於《LO》，佢就整咗個指環系統用嚟俾玩家自行決定點調校個角色強弱，譬如想擅於屬性攻擊就裝火或雷系指環，或者可以做到藉防禦嚟補油，任君選擇。而且當裝上特定嘅指環之後，喺攻擊時就會出現兩個圓圈，只要睇準兩者剛好貼近嗰刻按掣，就會達成「Perfect」令攻擊力增加約兩、三成，反之失敗「Poor」則減弱不少。仲有當同伴數量增加，亦會影響到後排嘅「肉牆」損傷數值，基本上能否打敗頑強頭目都係睇呢幅牆夠唔夠硬咯。
街貨勁缺炒高兩成
XB360遊戲已經唔止一次被炒賣，《LO》都唔例外，一度炒至四百左右；更有人寧願畀四百幾蚊直接買日本水貨，可想而知幾得人心。話時話，佢啲畫風有特色得嚟同以前幾隻《FF》不遑多讓，金屬場景似《FF7》，而古舊日式建築則似《FF10》，都算係集天下之大成。雖然亞洲中文版要到明年2月先推出，但佢基本內容同發售中嘅英日文合版無異，僅在於增設中文語言選擇，既有中文享受又保留咗日文嘅原汁原味配音，唔想捱炒價大家不妨等多陣睇定啲先。
機種：Xbox360
廠商：Microsoft
類型：RPG
人數：1人
價格：$329(日文版)
查詢：微軟(800964215)
