姨甥仔啱啱學識滑冰，就纏住話聖誕要去又一城睇聖誕老人同麥兜滑冰。吓，聖誕老人係西人，麥兜係土炮，點解會一齊滑冰？
又一城嘅靚仔公關Desmond話，又一城嘅溜冰場搵咗聖誕老人同麥兜喺呢個禮拜五（14日）夜晚8點15分，嚟一場「當聖誕老人遇上麥兜與好友冰上匯演」，免費任睇。呢個月21到24日期間晚上7點，仲搵到世界有名嘅花式溜冰運動員兼編舞家CraigHeath，聯同80個打扮花俏嘅溜冰學校學生，喺冰面上演出聖誕故事，又係免費㗎。
Desmond仲話，又一城仲搭咗一間七彩繽紛嘅聖誕老人屋，大家只要付出50蚊，就可以同聖誕老人合照。消費blog嘅粉絲梗係唔使錢啦，佢哋會分別送出25張聖誕老人合照券，同理25張價值60蚊嘅溜冰入場券，有興趣嘅朋友可以聯同姓名、聯絡電話，並註明「消費blog讀者索取聖誕老人合照券」或「溜冰入場券」，電郵去mailto:[email protected]，先到先得。記住，每人只限選一款禮物，否則聖誕老人唔鍾意㗎。
逢周一至周四刊出