一曲《童話》令光良更為港人認識，由組合「無印良品」到個人發展，光良出道已十多年，雖不是一炮而紅，但他默默地為創作而努力，近年獲得不少認同。自從上一張唱片《約定》後，他隔了年多才完成最新一張碟《不會分離》，只因身為創作人的堅持。 撰文：胡比
大馬歌手光良早年在台灣走紅，近年憑《童話》一曲紅遍中港台三地，他日前來港宣傳時表示，新碟原定在今年6月推出，卻因為他堅持要等他喜歡的編曲人，所以才令新碟延遲，他說：「雖然同公司都會有啲爭拗，不過我唔想對唔住我嘅作品，係人都想快啲出碟，不過如果做一張自己冇信心嘅碟，我寧願唔做，今次呢隻碟係我出道以嚟最滿意、最喜歡嘅一張，我從來唔會聽番自己嘅碟，但今次我竟然會不停聽，真係好唔同。」
「唔想框住自己」
對於上一張碟《約定》的成功，在灌錄新碟過程中會否增添不少壓力？光良坦言：「每一次都唔會諗到邊隻歌會紅，好似以前嘅《第一次》到《童話》，每次都只想說服自己，要做得比以前好，每次都要做不同嘅音樂，唔想框住自己，如果唔係就冇進步。」
光良將自己定位為創作人，他表示做這張新專輯時發覺自己與以往有所不同，他謂以前為人比較灰暗，沒有現在的開朗，做人處事也比較正面，他說：「記得我剛剛喺馬來西亞去台灣發展嘅時候，剛剛係冬天，第一次感覺到冬天好凍，因為馬來西亞係冇冬天嘅，我自己一個人喺台灣街頭行，冇乜人識，嗰時又好掛住屋企人，頓時覺得自己好憂鬱，不過又覺得好感性，我都唔知點解會咁，可能呢種感性變咗我創作嘅其中一個元素。」
香港自掀起一股台灣風後，在台灣打滾多年的光良，又如何看這一般台風呢？他坦言：「我記得以前台灣有好一陣子都好流行聽香港歌手嘅歌，不過近年好似唔同咗，可能𠵱家香港人可以接受唔同類型音樂，不過我覺得呢股台灣風有啲歌手來得好快，但係亦都好快會唔見咗。」
被當作台灣歌手
光良在馬來西亞出生，後來到了台灣發展，有不錯的成績，大家都將他當成台灣歌手，他笑說：「其實只要大家知道我係馬來西亞人就OK，都冇介意係邊度嘅歌手，不過反而係馬來西亞嘅傳媒比較在意呢啲稱號。」
人物誌：小學顯露音樂才華
現年37歲的王光良，出生於馬來西亞怡保，小學四年級開始學鋼琴，中二開始音樂創作，95年簽約台灣滾石唱片，其後與黃品冠組成「無印良品」，推出專輯《無印良品X2》、《三人行》及《想見你》。組合於00年解散，光良作個人發展，前年推出《童話》專輯，在亞洲銷量報捷，去年更在紅館舉行「光良第一次童話演唱會」。
