國泰航空香港國際賽，喺十二月九日順利完成，總入場人數有五萬六千幾人，總投注額達十億零二百萬元，人數與去年差唔多，投注額就多咗幾千萬，可見人人手鬆咗。
每年嚟香港國際賽之國際馬圈人士都係高消費階級，為本港酒店餐飲業帶嚟唔少生意，而賽前活動多多，最令人注目嘅就係十二月八日早上嘅馬匹拍賣會，沙田馬場馬匹亮相圈成為現成拍賣場，環境一流。想起近十年前馬匹拍賣在灣仔會展中心舉行，嗰陣時淨係運啲馬到會展以及佈置拍賣場，已經花費不菲，而且好唔方便。𠵱家有咗天幕沙圈，拍賣變得好輕鬆。朝頭早有試閘，跟住食早餐，然後喺十點半開始拍賣，你話啲馬主幾好享受，幾妥當呢。
近年大家好景，馬主舉手特別疏爽，每匹馬平均成交價高達四百四十萬幾，創歷年紀錄，馬會賣晒十七匹馬就收番七千五百萬，扣除成本，毛利有四千萬元，唔怪得拍賣會完畢後，在會所「銀袋」飲茶，碰到行政總裁應家柏，佢笑到四萬咁口，講咗兩次toogood（太好了）。
星期日嘅四場國際賽事，好精彩。千二米短途錦標賽，「蓮華生輝」係一面倒大熱門，位置賠率在電算機上打出1.0，港大徐立之校長一年只到馬場兩三次，呢日應國泰航空之邀，與朱經武、吳清輝、梁智仁三位校長出席，徐校長問左丁山：「賠率一倍？點有得贏呀？」左丁山答：「唔使驚，馬會會賠番五毫子畀你！」「蓮華生輝」果然一如所料，輕易取勝，徐校長亦讚嘆不已：「一踩油就過晒！」
如果賽馬咁易預測就冇窮人咯，到咗第五場二千四米香港瓶，大熱門「狄倫」只得1.6倍，點知唔知跑咗去邊，左丁山為之眼光光。頭馬係法國馬「廸諾醫生」（Dr.Dino），馬主與成班朋友在我哋面前大叫大跳，知道贏出後，男男女女擁作一團，兩位女士仲流埋眼淚㖭，做馬主最刺激之事莫過於此。千六米香港一哩錦標鬥得非常燦爛，香港袁仕傑先生隻「好爸爸」險勝高多芬賽馬集團嘅「奇速達」，但隨後跑二千米香港盃，高多芬嘅「威滿蹄」巧取何鴻燊之「爆冷」出番啖氣！