新GT等足60年　瑪莎出塵艷星

雖在港已多次感受過Maserati（瑪莎拉蒂）嘅懾人魅力，但今趟卻是首次在新加坡實試，兼且還是全新一代GranTurismo超級跑車，出發前興奮得不能入睡。到正式試車，一部艷紅戰車出場，襯在藍天白雲、樹影婆娑底下，簡直耀眼得過份，走在公路上，沿途別車有意無意迴避，令MaseratiGT走得暢通無阻，恍如天仙出塵，艷壓星洲。

記者、攝影：梁美甜
鳴謝：ItalianMotors

名家設計經典回歸

以前我還未成為車版記者，不過早已將Maserati列入DreamCar之列，萬萬諗唔到今時今日可以駕駛佢疾飆1小時，仲要係GranTurismo超跑！今次喺新加坡試駕車款乃係自1947年推出A61500GranTurismo以來嘅新一款GT，事隔60年，大會仲高調咁用「ISBACK」做宣傳口號。原來全車設計出自名家Pininfarina手筆，以筒形同圓形作為設計元素，如隱蔽式前燈、前排長直形嘅結構同埋車側三個魚鰓通風口等，我覺得又美艷又有型，仲好Sexy㖭！

1廠方安排紅、白、藍、黑4色GT供傳媒試駕，我二話不說便揀了部艷紅GT。

2輕踏油門，反應直接利落，沿途暢順得令我享受到久違了的駕駛樂趣。

3特大鬼臉罩及廠徽，可算GT特色。

不自覺湧起加速雄心

今次試駕時間好短，僅得兩小時左右，根據大會於車上GPS設定路線而行，由聖淘沙出發，行經HarbourFront一帶再轉入多條高速公路，以SingaporeZoo作為終點。由於上午11點出發時唔算多車，所以索性一試方向盤後嘅轉波撥片，以手動模式充份測試GT加速、轉波性能。
GT搭配V84,244c.c.引擎，睇住轉速去到7,100rpm時爆發出405匹馬力真係勁到暈！驚人動力令GT由0-100km/h只需短短5.2秒！GT配置嘅ZF波箱一向厲害，新版仲Upgrade咗，全新嘅自動適應學習機能提供最佳操作模式，令GT喺任何情況下都可將性能發揮。
回程正值午膳時間，超多車，用回普通模式，舒舒服服用D波走全程，不過仍壓不住這馬力巨獸，輕踏油門剎那間又飆上近百公里，就算穿插車龍間仍保持靈活，急煞反應亦快，駕着這火紅GT，所經之處都引來艷羨目光，虛榮心、速度同雄心充斥我腦袋！

■車尾高翹增添戰鬥格，我看在眼裏更覺性感非常。

■跑車格局居然有房車空間，邊個話魚與熊掌不可兼得？

獨特豪華超跑

全新MaseratiGT嘅性能不庸置疑，內裝亦豪華舒服得很；GPS導航系統、旅行計算機、收音機與CD功能嘅Bosch-Blaupunkt多媒體設備、GSM行動電話套件、Bose音響設備、雙區恒溫、定速巡航、上坡駐車輔助、14向調節電動座椅附三組記憶模式、手枕內冷藏箱等等。都未算，為咗進一步突出個人風格及獨特性，Maserati更推出個性選裝，簡單而言即由車身顏色、內飾搭配、方向盤、波棍、甚至煞車碟顏色都任君選擇，以Maserati嘅產量同個性化配置，每部車絕對係「One&Only」！