樸茨茅夫成功「踩場」兼「攞景贈興」！昨晚英超早場，到訪賽前有奧尼爾及艾邦拉荷榮膺11月最佳領隊兼球員的阿士東維拉，爆出小冷門以3:1勝出，完全冇面畀！
格力加特拿擺烏龍
維拉今役可強陣迎戰樸茨茅夫，前線續由剛獲上月最佳球員的艾邦拉荷夥拍卡維攻堅。不過，比賽初段樸茨茅夫佔得大部份優勢，中場卡蘭積卡25碼的遠射差點收死主隊門將卡臣。9分鐘，樸茨茅夫守將柏馬洛特接應角球後遠射，禁區內一輪混戰下，維拉中場格力加特拿擺烏龍致球隊落後0:1。40分鐘，樸軍憑格連莊臣右路傳中予蒙達利遠射破網，開出15倍「首球」，同時為客軍半場領前2:0。
換邊後阿士東維拉搶回不少攻勢，但保馬及艾邦拉荷等的射門，俱被今役演出神勇的門將占士一一撲出。戰至61分鐘，維拉開出龍門球不遠，蒙達利在中路搶走李奧曲卡的腳下球後，再推前離門近30碼勁射破網梅開二度，樸茨茅夫遙遙領前3:0，直接宣佈判維拉死刑。及後維拉只憑巴利的12碼追近紀錄，惜最終主場仍以1:3落敗。
通常剛獲得每月最佳領隊的球隊，翌仗多數不勝或戰敗的例子確實不少，今次奧尼爾亦不例外。賽後維拉16戰得27分排第7，樸茨茅夫則壓過今晚才出戰的曼城，憑得失球差較佳升上聯賽榜第5位。
文：畢傑