衞冕的南華昨日因排陣失當，繼聯賽揭幕戰後再以1:2不敵宿敵傑志，緣盡今屆彩豐行高級組銀牌賽；而東方在另一場準決賽，雖有兩名球員被逐，但仍憑洛廸高加時完場前的入球，爆冷淘汰愉園。傑志與東方兩支被睇淡的藍衣兵團殺入決賽，本月23日將於大球場一決生死。
南華、傑志、東方及愉園4支老牌球會昨日聚首旺角球場，強勁戲碼吸引逾5,000名觀眾捧場，打破今季入座紀錄。
南華與傑志這對歡喜寃家繼聯賽揭幕戰後，於今場銀牌4強戰再次碰頭，而在聯賽排榜首的南華未能延續4連勝氣勢，開賽到23分鐘，便因新援盧諾誤傳，造就傑志的盧均宜單刀建功。
羅傑承：輸波咎由自取
落後一球的南華隨即變陣望挽回失地，換入文彼得及伊達這對近期主力搶回中場優勢；但換邊後防線再度犯錯，被哥倫近門射破張春暉十指關，令傑志領先至2:0。雖然南華隨後由廸天奴破蛋，但餘下時間無法再攻破傑志嚴密防線；球證鳴笛，亦宣判了南華失落今季首項錦標。
南華班主羅傑承賽後表示：「球員踢得差，輸波是咎由自取；白鶴平日操練幾好，可惜比賽就冇影。今仗犯錯的新援盧諾已被辭退，目前等T史高斯開出條件，如價錢ok將會再次加盟南華。」
傑志出線派10萬獎金
傑志總領隊伍健賽後決定，向球員發放10萬港元贏波獎金，他說：「入得決賽，當然希望可以贏東方捧盃；不過球隊周五要在聯賽再次硬碰南華，這點會較輸蝕。」
東方在銀牌能夠淘汰愉園，就像完成了一項不可能的任務。賽前被看低一線的東方，上、下半場各有一名球員被逐（李思明、黃耀富），但仍能在法定時間90分鐘內守和愉園；愉園亦有法格拿在下半場65分鐘領第2面黃牌被逐。
東方9人擯走愉園
東方能夠晉級決賽，除了加時尾段一箭定江山的洛廸高外，門將盧斯奧多次力挽狂瀾亦應記一功。
東方總監梁守志對球員表現極為讚賞，「劣勢都有這種打不死精神，相信各甲組隊中只有東方能夠做到，所以每名正選會有5,000元獎金鼓勵。」
本報訊
花絮
球迷支持氣氛熱鬧
噚日由4支老牌球隊所組成嘅銀牌準決賽，如賽前所料有超過5,000球迷入場，雖然賽事唔算好精采，但勝在夠激烈，令現場氣氛相當熾熱。頭場東方鬥愉園，前者大部份時間人少打人多，竟然頂到尾兼贏埋波，結果贏得唔少球迷掌聲。
東愉戰3紅11黃真誇張
今季球證執法惹來各方批評，好似噚日東方對愉園一仗，球證吳佳林（左二）共出示3紅11黃，都咪話唔誇張；唔少球迷話睇到今季球證嘅判決一錯再錯，真係越睇越激氣；部份更建議足總不如搵外國球證執法，以免睇到一肚氣。
王振鵬被「問候」難忍
傑志嘅大連守門員王振鵬（圖），噚日對宿敵南華時就少不免畀南華球迷「問候」，呢個夠晒直嘅北方人，完場後就忍唔住衝入場同該班南華球迷推撞，同鄉劉全昆亦忍唔住「幫手」，最後眾隊友勸開，先冇釀成不愉快事件，兩人之後除咗畀球隊高層警告，仲要喺後門離場，以免再同南華球迷有接觸。
耶域治父女同慶
上季尾輸咗個聯賽冠軍畀南華嘅傑志，今季喺聯賽雖然畀南華放甩，但就做咗佢嘅剋星，季內兩次碰頭都以2:1贏波；傑志隊長耶域治賽後抱住6個月大嘅囡囡（圖），話希望周五聯賽可以再贏多次南華，保住爭標希望。
