隔牆有耳：鬥早玩回顧 2007十大經典場面 - 李八方隔牆有耳：鬥早玩回顧 2007十大經典場面 - 李八方
眨吓眼又一年，係時候回顧過去，展望未來。港台搞咗個「聲音檔案選舉」，畀市民上網投票，喺今年20個經典soundbites中，選出10段最觸動神經、引發共鳴嘅。德成局長標尾會，寸陳太忽然民生嘅言論咁技驚議事堂，自然趕得切成為候選「生跛」。八方做報紙，除咗聲音仲要畫面，所以都自行選咗今年嘅十大經典場面，畀大家參考吓。
煲呔腳軟PK
做政治家，其中一項條件係夠硬淨。聽到陳太個名就腳仔軟，唔合格啦。
李卓人一脫成功
阿人除衫撐扎鐵工人，除咗令人驚覺男人唔keep好易走樣外，亦令扎鐵工人士氣大振，最後成功爭取到加薪。
梁安琪區選論壇發惡
「不得作人身攻擊！」區選辯論咁悶，但就因為梁小姐出位嘅表現，單喺YouTube就錄得超過六萬人點擊呢段片。但梁小姐最後都輸咗。
保星衞后
由天星到皇后，本土保育運動、人民參與規劃嘅呼聲一浪接一浪。何來小姐最終未能由街頭走入議會，但香港人對有關議題嘅意識真係已經唔同咗。
樂樂盈盈來港
606同610唔係港股編號，但香港人一樣咁熱衷。希望兩隻嘢快啲開枝散葉啦。
抽水哥一炮而紅
抽水哥響朵之作，但據聞之後調咗去做包括抹車嘅內部工作。唔知呢個月澳門回歸紀念日嘅大遊行，佢會唔會現身──去遊行呢？
四太贏到癲
此梁安琪不同彼梁安琪，人家係賭王四太，贏馬之後真情流露之嘛。不過輸馬呢，可以睇睇四太喺呢版嘅另一張相。
四太贏到癲
老爺係股神，生個女又係觀音托世，無論個市今年返唔返到三萬點，徐子淇都咁幸福啦。