工展會噚日開鑼，特首文革曾同商務及經濟事務局局長馬時亨主持開幕儀式後分頭掃貨。肥馬好疏爽，行咗一陣就使咗2,000幾蚊，「戰利品」包括麵餅同蠔油，八方見佢「貢」埋個賣養生產品攤位，左挑右選一輪，買咗樽聲稱可以補腎、益精、調節陰陽平衡、治腰膝痠軟，甚至增強性能力嘅丹藥，笑騎騎滿載而歸。
工展會買藥益埋老婆
肥馬話兩盒400幾蚊嘅麵餅，係送畀前局長葉澍堃嘅聖誕禮物，真係物輕情義重。睇肥馬身形就知佢為食，買咗400幾蚊蠔油、XO醬同橄欖油，至於樽丹藥，佢坦言自己啱食，仲買多樽益老婆，兩樽藥共960蚊。肥馬後來買多對302蚊嘅馬術公仔送畀囡囡。
肥馬冇透露做乜要食補藥，希望佢唔好搞錯用嚟排毒減肥就得嘞。肥馬為人圓滑世故，唔排除買嚟孝敬煲呔或者同其他局長分甘同味。煲呔日前喺政府總部仆親，八方聽聞有關方面檢查地毯後，發現並冇「蹺」起絆到特首，煲呔若然唔係聽到陳太個名嚇到腳仔軟，仆倒就肯定係個人問題。人到中年腰膝痠軟唔出奇，當眾仆親顯示腳軟問題幾嚴重，所謂病向淺中醫，八方勸煲呔唔好諱疾忌醫嘞，萬一呢隻痛腳俾人捉住，呢一仆隨時成為佢日後腳痛落台把柄，都係嗱嗱聲啪幾粒落肚，紮行個馬戙喺陳太同土共面前，實冇人抽到你後腳。
左魔成啪丸調理陰陽
至於另一個虧佬嫌疑人非曾德成莫屬，佢左毒發作咁偏激，八方建議佢食藥調理吓，肥馬買嘅呢隻丹藥似乎都啱佢食，雖然未必解到左毒，卻有調節陰陽平衡、主治暴躁易怒之效！煲呔為咗自己利益，減低其他土共受感染、左毒發作辱罵其他港英餘孽風險，應責成食物及衞生局局長周一嶽勒令左魔成接受治療，日日依時食藥，直至佢道歉為止；至於佢把口咁臭嘅問題，則要另請高明對症下藥。
煲呔噚日都有喺工展會購物，不過好克制，只係買咗條南亞裔婦女手造腰帶，盛惠85蚊，佢畀100蚊免找，班女士一早知特首駕到，送多條灰色煲呔同心意卡畀佢，煲呔唔客氣收晒。