「邊個又勇闖荷李活、邊個又獲荷李活賞識做二打六角色。」呢幾年電影界隔籬阿婆飯香，好似無論導演、演員都要拍過荷李活電影先叫紅咁。
對香港電影影響較深遠嘅，可能唔係荷李活，而係法國電影；杜魯福、高達等法國導演名字，香港導演經常掛喺口邊，港產片當年都有班「新浪潮」導演好似徐克、譚家明咁，而新浪潮咪又係嚟自法國電影界。法國電影唔似荷李活，咩都講大製作，反而講創意，着重人與人嘅情感，咪好似我哋港產片囉。
講咁耐，其實係因為法國電影節上周五開幕，會播23套新片，其中12月15日上映嘅《腦網追兇》雖然係科幻片，但唔會好似荷李活片咁，又飛車又怪獸，而係透過警員追緝兇手，探討人類大腦嘅記憶。如果想睇，12月13日前將姓名、電話、地址電郵去mailto:[email protected]，註明索取「第36屆法國電影節《腦網追兇》電影戲票」，頭15名可以各有兩張戲票，先到先得。
逢周一至周四刊出