「我想做好人！」聽到呢句說話，八方即刻諗起電影《無間道》劉華飾演嘅劉健明。「一哥」鄧竟成孻仔鄧智兆噚日以「三冠王」優異成績警校畢業，十足《無間道》嘅劉華，不過𠵱家好多人都認得佢，八方肯定佢唔使做「無間道」。
制服唔整齊被罰
今年有25名督察同203名警員畢業，「一仔」鄧智兆以全級最佳成績獲施禮榮盾，又以全班最佳成績獲榮譽警棍及全班最佳學科成績獲優異證書。身為一哥個仔，智兆話從來冇獲特別優待，制服唔整齊或者步操出錯一樣被罰，佢又話自己向來要求高，視老竇為榜樣，老竇教佢要做好人，佢覺得警察係好人，所以投身警隊。
八方問佢因父之名係咪好大壓力，一仔好自信咁答：「任何人都有壓力。」有警校阿Sir同八方講，一仔非常搏命，無論讀書考試定係體能訓練，樣樣都要做到最好，指佢靠父蔭好唔公平。
乖仔畢業做見習督察，一哥老懷安慰，佢話當初擔心個仔大壓力，但阿仔堅持行呢條路，佢亦唔會阻止，佢畀兒子錦囊係做好自己工作。鄧智兆被派駐上水警署巡邏小隊，聽日就出更。