朱古力跟其他零食不同，它廣受男女老幼歡迎，大時大節更是唔少人的心水禮物，斷估冇人會送薯片過聖誕或情人節吧？佳節臨近，又係送朱古力的好時機，高檔的朱古力店，價錢貴一截，包裝及口味俱佳，試食兵團一次過試勻5間城中大熱的朱古力店，試吓邊間係TheBest！
記者：盧家蕙
攝影：梁細權
Model：Vene、Chloe、Penny@TheGroup
鳴謝：海港城
食朱古力 要嗅睇嚐
品嚐朱古力時，應讓它在口腔內自動溶化，感受其不留微粒的幼滑質感。味覺應是從堅果開始，然後是烘過的朱古力味，最後是甜味或其他香味，優質朱古力更會令人齒頰留香。分辨優質朱古力可從以下幾點着手。
散發新鮮濃郁的香味，太香或太甜，朱古力或已加入人造色素或防腐劑。
表面色澤均勻，沒有氣泡或瑕疵，外形及設計更細緻精巧。
除Truffles外，朱古力外層通常為糖衣，口感半硬，咬時外層會啪一聲裂開。
本地薑 新口味最騎呢
龍島朱古力始於1976年，以製作講究、口味創新聞名，每粒朱古力均用高級比利時朱古力並以人手新鮮製造。經典款式響噹噹，最新推出的咖喱、海鹽及生果亁朱古力，外形及口味更是與別不同。
咖喱味（左）海鹽味（右）$150/100g
Truffle的外形似石頭，由於手製關係，每粒的顏色及外形也略有不同。海鹽味比預期中好，甜中帶鹹；咖喱味夠獨特，最啱交換禮物整蠱人。
Penny：海鹽味唔太鹹，落到喉嚨有少少澀味。
Vene：聞到幾香嘅咖喱味。
Chloe：咖喱味好詭異。
總評：稍甜，勝在新口味獨特。
歷史悠久 好味有意義
源於1913年的比利時Leonidas，享譽世界近百載。採用最優質的材料，於比利時人手製造，逾百款經典朱古力每星期空運抵港，並儲存於陳列雪櫃7天（雖然保鮮期有三星期至三個月），第八天便送往慈善機構，收入扣除開支後，更全數撥捐庭恩兒童中心。
Coupes $78/100g
外層不是包裝紙，而是朱古力，外脆內軟，甜而不漏，面層灑上不同口味的果仁或水果亁，增添食味及咬口。今次試的Coupes，就分別為熱情果松露、Tiramisu、香杏茸牛奶、牛奶椰子和焦糖榛子味。
Penny：食朱古力兼做善事，有意義。
Vene：唔太甜，最香滑，抵食。
Chloe：熱情果碎好似爆炸糖，甜甜哋卜卜脆。
總評：最香甜幼滑，價錢適中。
中東口味 大件抵食
源於1974年的黎巴嫩Patchi，堅持採用荷蘭及象牙海岸入口最高質素的可可豆和奶類材料，以人手逐粒檢驗並以精美錫紙細心包裝而成，保存了獨特細緻的風味。
杏仁碎味（金）榛子碎味（銀）$60/100g
牛奶朱古力極之墜手，每塊差唔多有10克，平均只需$6.6一塊，款式以榛子、杏仁及咖啡為主，口味大眾化，入口頗滑溜，抵食之選。
Penny：杏仁味好香脆。
Vene：最易入口，冇怪味。
Chloe：超大粒，好飽肚。
總評：足秤抵買易入口。
布殊激讚 甜到震
比利時Debailleul剛於十月進駐香港。創於1983年，於2004年的TheLasVegasworldpastrychampionship獲獎而響名堂，法國網球公開賽及美國總統布殊設宴時的指定甜品，嚴選優質食材製造，並由比利時新鮮空運到港。
9粒裝禮盒$220
朱古力外形頗具心思，如咖啡豆形、孖心形及印上m字的朱古力均屬招牌貨，入口即溶，可可味濃，但稍甜。
Penny：m字嗰粒好似有陣牛肉亁味。（其實係比利時餅亁味）
Vene：過甜。
Chloe：咖啡豆嗰粒簡直係一杯咖啡的濃縮版。
總評：好香滑，但偏甜。
潮人最愛 食Logo
選址於香港開設全球首家agn囗sb.D囗LICES，名字代表「愉快與滿足」。開店以來生意滔滔不絕，所有法式朱古力由香港以傳統方法手製出來。
$16/粒
朱古力表面的圖案代表唔同的味道，波點的是金萬利酒黑朱古力；AGN囗SB.的為檸檬薑黑朱古力；蜥蜴是冧酒味；b是冧酒提子黑朱古力，至於2007及星星分別為薑汁牛奶及荔枝黑朱古力。面層圖案擺明硬Sell，卻廣受一眾潮人及OL力捧，暫時以生果及酒香系列最受歡迎，果味中必試以荔枝及薑汁味。
Penny：酒味一般，果味好食啲。
Vene：粒粒都好靚！唔捨得食。
Chloe：荔枝味最搞鬼。
總評：包裝一流，味道不及其他比利時的牌子香滑。
Shoplist
agn囗sb.D囗LICES（29560018）
Debailleul（27353800）
LeonidasPralines（23177448）
Lucullus（龍島）GourmetShop（23170832）
Patchi（31015553）