噚日警察學院畢業禮由警務處副處長馮兆元主禮，馮Sir明年初榮休，由佢檢閱一班新紮師兄師姐，有交棒、接棒嘅意義。馮Sir近年留守後防做管理工作，其實佢後生嗰陣係神勇幹探！
1982年1月18號晚，身為督察嘅馮Sir率領五個探員，掩至北角南方大廈拘捕持械疑犯，遭到激烈反抗，雙方駁火20幾槍，馮Sir一馬當先，俾子彈擦傷左臉，一個疑犯中槍，賊人最終一網成擒。馮Sir執番條命事後不停嗌「好彩」，又猛灌凍水定驚。
擒賊有功，馮Sir獲英女皇御批，由港督頒發「紅雞繩」表揚。馮Sir噚日勉勵畢業警員終身學習，又話警隊接班制度穩定，一代新人勝舊人。警隊消息話高級助理處長鄧厚昇最有機會升任副處長，兩名助理處長古樹鴻及鄧甘滿都有可能再上層樓；總警司盧偉聰、范錫明就可能晉升做助理處長，兩人被視為警隊「明日之星」，係未來警隊最高層熱門。