馬會噚日舉行國際馬匹拍賣會，編號Lot12嘅拍賣馬獲多名圈中人重點推介，甫出場就成為焦點，好多馬主搶住舉手競投，結果由大富豪夜總會老闆羅焯以全日最高價720萬元投得，比成本價183萬元高出近四倍。羅焯唔使同前妻分身家，慳咗一大筆錢，可能因此出手零舍豪氣。
噚日競投過程激烈，舊年以破紀錄750萬元投得「絕塵」嘅馬主鄭強輝同羅焯輪流舉手，經多次叫價最終羅焯得手，全場人即鼓掌祝賀，羅焯贏盡風頭。
羅焯同八方講，用720萬買到心頭好一啲都唔貴，就算出到1,000萬都在所不計，初步諗住幫愛駒命名為「世界繁榮」。
馬主疏爽，帶挈馬會有可觀進賬，噚日有17匹馬拍賣，平均成交價高達440萬元，比去年平均價290萬元高出五成二，馬會淨賺4,109萬。