港島區立法會議員補選結果大家都知，左丁山搵咗一份各票站投票結果睇真啲，發覺香港島選民之中，住在富裕區域嘅，全部傾向陳太，葉太獲勝嘅票站，多數住於基層區域，假如明年立法會選舉之時，呢啲基層選票全數回歸民建聯，葉太都幾麻煩。
（一）首先講中西區，十八個票站之中，陳太贏咗十六個，共得票三萬一千五百幾，葉太贏咗兩個（石塘咀、西營盤），共得票接近二萬三千八。在石塘咀與西營盤呢兩個票站中，葉太得3750票，陳太得3635票，葉太險勝115票。初步結論，中西區包括中環、山頂、半山東、大學等高收入地區，陳太佔盡優勢。
（二）南區有二十五個票站，陳太贏二十一個，共得三萬八千九百幾票，葉太贏咗四個（鴨脷洲北、置富一、石漁、赤柱及石澳二），不過如果將鴨脷洲三個票站合計，赤柱石澳兩個票站合計，置富兩個票站合計，都係陳太贏；初步結論，陳太在南區贏晒。
（三）灣仔區有十二個票站，陳太全部贏晒，大坑、渣甸山、樂活道、跑馬地、司徒拔道啲中上階層以至修頓、大佛口啲平民多數支持陳太。
（四）東區，由維園打落至小西灣，係民建聯票倉，有四十二個選區，其中七個支持葉太，三十五個支持陳太。葉太在東區得到七萬一千幾票，係佢所得總票數嘅51.8%，相信民建聯在東區為佢盡咗好多力。呢區之中，陳太得八萬七千幾票，兩位阿太共得票接近十五萬九千張，可見係兵家必爭之地，誰人贏晒東區，幾乎必勝香港。葉太在此區得到七個票站支持，就係柴灣、小西灣、環翠、柏架山、和富、錦屏與下耀東。從票倉投票分析，住在東區私樓選民，傾向陳太，住在屋邨選民，較鍾意葉太，但係屋邨選民及北角選民嘅力度不足以令葉太當選，而且陳太在屋邨嘅表現亦唔係好曳。睇完一輪數字之後，明年港島區群雄並起，民建聯嘅候選人比較難以取得中產及富裕地區支持，雖然係有東區屋邨及北角鐵票，想橫掃泛民主派並不容易，除非泛民唔爭氣，因內爭自我毀滅啦。