無綫今晚8點半播《歡樂滿東華2007》，李克勤噚日同汪明荃等先後為《東華》綵排同拜神，對於佢太太盧淑儀喺blog內公開BBRyan嘅相，又爆自己受細菌感染要暫停餵人奶，克勤苦笑話：「呢個blog唔超過20個人知，我要懸紅1千萬搵個二五仔。我好想知邊個出賣我，個blog只係畀親戚朋友睇，今朝個blog已經鏟走晒，內容唔再講。早知我生仔發相，唔好益人啦！」
王賢誌一晚走兩台
亞視喺今晚7點半直播《第四十四屆金馬獎頒獎典禮》對撼《東華》，搵咗以前年年為《東華》做司儀嘅王賢誌做直播司儀，聽講王賢誌幫亞視做完直播之後，仲會入無綫探班。噚日馮仁昭打電話問佢係咪諗住今晚入無綫踩場時，王賢誌就話：「唔好誤會，我成家人都喺度，我妹妹王賢慧今年做咗東華總理，所以成家人一齊支持吓啫！」
此外，鄭希怡噚日喺商台做訪問，今晚佢會同周汶錡（Kathy）為《東華》齊表演揸車飄移，佢話前日終於同Kathy一齊練過，之前話Kathy寸鄭希怡嘅甩褲事件，咁佢哋見面有冇尷尬？鄭希怡話：「大家都冇嘢，都冇需要提嗰件事，大家都明㗎啦，只係想籌多啲錢。」
