一年一度馬壇盛事又嚟嘞，今日就喺沙田馬場舉行，節目多多，馬迷自然不可錯過，非馬迷亦可入場體驗吓國際賽馬氣氛。
「國泰航空香港國際賽事2007」除咗有四場世界級名駒大比拼之外，仲有北京少林武術學校表演團表演少林武術，歌星李克勤、王菀之獻唱，盛裝舞步雙人舞馬術表演、煙火滙演等等，令人目不暇給。我哋呢類馬迷，自然全神貫注諗邊隻馬會贏得大賽。又適逢今日有啲老友出馬，睇吓可唔可以捧場先，例如第十場四號「八逢九紫」，紫微楊係馬主之一，前兩日左丁山碰到另一位馬主胡定旭主席，問佢「八逢九紫」上次大熱倒灶，今次如何，紫微楊有冇算過呀？胡主席笑云：「點算呀，今次點都有啲機會嘅！」呢隻馬要從後打衝鋒，排第十三檔反為有利。另外馬主H佢哋有「鞍山勇馬」（第六場十一號）排一檔，一定係帶頭領放，但有隻十號「小戰士」鬥搶，相信放唔到返嚟。
講番大賽，第四場一千二百米，香港代表「蓮華生輝」殺聲震天，機會極高，澳洲派來嘅馬后「安小姐」（十三號）係雌馬，受讓三磅，呢隻澳洲短途馬后，跑十場贏咗七場，包括五場一級賽，在澳洲全無敵手，幕後信心十足，到時勢將上演一場世紀大戰，澳洲、愛爾蘭嗰邊嘅莊家開出盤口係二點四倍與二點五倍，難分高低。左丁山梗係捧番香港馬啦。
第五場二千四百米香港瓶，一號愛爾蘭馬「狄倫」係全球最高評分馬，長途馬王，有備而來，外國專家一致看好，代表香港幾匹馬，又真係幾弱，即使係「爆炸」（十號）都唔夠跑。
第七場香港一哩錦標，十三號法國雌馬「大將領」係大馬主阿加汗位千金PrincessZahra（沙拉公主）擁有，好想捧盃，但麥通酋長隻十號「藝術瑰寶」亦係千六米專家，兩駒必有惡鬥。馬主N提醒一號日本馬「金剛力王」今年六月跑「安田紀念盃」，表現犀利無比，跑出一分三十二秒三時間，香港馬「好爸爸」在後面食塵，「大將領」與「藝術瑰寶」未可安枕。第八場香港盃跑二千米，「爪皇凌雨」與「爆冷」兩匹香港馬威晒，嚇到外國馬唔敢嚟。「爆冷」要為賭王何爭一口氣，有當起之銳，如果仍然贏唔到「爪皇凌雨」，唔該何先生買過另外一隻馬返嚟。