選美出身嘅影后級人馬「美美」，經過一輪大肚生仔同收身之後，終於復出搵奶粉錢，照計已為人母嘅幸福女人，通常都比較做女嗰陣和善同有愛心，應該收晒脾氣變得溫馴，但美美就一啲都冇改過，不單止態度依然照舊腌尖臭寸，仲越嚟越麻煩㖭！
拍劇夠鐘走人
美美最近幫三色台拍劇，雖然佢一早講明每日都要準時收工，趕住返屋企湊仔，但始終拍劇嘅嘢話唔埋幾時收工，有時對手NG多咗，就會有阻延，不過佢就唔多咁理，一有唔順心嘅嘢就黑面，又多多要求，乜都要顧咗自己先，唔單止開親工都要拍咗自己嘅戲份先，唔可以等，仲連整頭化妝都係要以佢為先，搞到同佢做對手戲嘅「山哥」都要就晒佢，其實山哥有頭有面，邊度使畀面美美呀，不過美美話晒都係佢老友「至冧」個老婆，山哥惟有就住阿嫂啦！
Textby關仁
