男人40應該怎樣？最理想莫過於事業有成，家庭美滿。
現年43歲的無綫小生曹永廉，上月與姜大偉女兒姜依蘭奉子成婚，成家立室，明年2月又迎接小生命誕生，家庭絕對稱得上邁向光明。可是阿廉的星途卻屢欠運氣，總無緣攀上一線小生位置。阿廉回想當歌手出道時衰到貼地，發歌星夢欠下10多萬債項，最終苦幹還清，現在手頭是有點鬆餘，事業發展雖不算大紅大紫，但他誓言會拼搏工作，買樓讓妻兒過安穩生活，或者上天也欣賞他這個優點，他人生中多個抉擇雖次序錯亂，倒是錯有錯着，苦盡甘來。 撰文：比華利
近日每晚扭開電視，總被無綫重播劇集《妙手仁心III》吸引着，該劇每個演員都演得恰到好處，扮演急症室醫生向眾仁的曹永廉，更因這套劇人氣一度急升，可惜升勢點到即止，只為他帶來在無綫多年來平穩的發展，並沒有拉近登上視帝的機會。
欠10多萬卡數
阿廉於91年以歌手身份加入娛樂圈，當年只有27歲的他大發歌星夢，阿廉日前形容當年的發燒程度：「我認為做歌手可以帶嚟多姿多采嘅生活，仲同自己講要做歌手終老。𠵱家做過藝員同歌手，再揀我一定揀做藝員，歌手生活圈子太狹窄，唔及藝員接觸層面多，見識都多啲。」
始終現實歸現實，試問有多少個樂壇新人可以抵得上「荷包亁硬化」這個絕症？阿廉先後出過3張唱片，銀行戶口不但沒有進賬，反而負債纍纍，他說：「做歌手開支好大，要置好多裝，搵嘅錢全部放晒喺衣櫃，講真收入又唔多，我冇錢就惟有一張信用卡冚另一張信用卡，短短幾年我就揹咗10幾萬卡數，利息又高，最後越滾越多。」
阿廉為還清債項，不得不向現實低頭，99年加入無綫大家庭，他記得當年薪金只得僅可餬口的數千元，面對那筆卡數，阿廉要死慳死抵，他說：「我試過窮到銀行存摺得200蚊，當時曾經一度向現實低頭，想轉行做保險或者地產，但偏偏呢啲時候又有啲機會飛出嚟，有啲嘢拍吓，總係吊住條命，最後捱咗3年，我終於還晒啲卡數，我就即刻將所有信用卡剪爛，警惕自己要有個新開始。」畢竟當藝人沒一張信用卡甚為不便，直至1年後，阿廉知道自己懂得理財後，他才重新申請信用卡。
欣賞奸仔嘉穎
事業和財政狀況同時跌入深淵，令阿廉從失敗之中吸取了教訓，他說：「我自己好知衰，慶幸屋企人一直喺身邊支持，也令我成個人長大晒，我堅決要珍惜日後擁有嘅一切。」
5年多前，阿廉與姜大偉女兒姜依蘭拍拖，他也受對方樸素勤力的性格影響，一直在水銀燈下默默耕耘，可是差不多同期出道的鄭嘉穎和馬浚偉已反超前，多次在劇集中擔正男主角，跟他們仍有一段距離的阿廉有否酸溜溜的感覺？他說：「坦白講真係冇，喺得娛樂圈工作，就要接受天時地利人和呢三樣嘢，講到好運，我自問未算，但都唔覺係運滯，其實公司不斷畀機會我。
「嘉穎同馬仔都係我老友，佢哋真係好有實力，我近排留意到嘉穎喺《通天幹探》入面扮奸，佢做得好歇斯底里，我都希望有機會試吓演呢類角色，挑戰一下自己嘅演技。」
工作守時務實
阿廉不急於逞強上位，與他穩陣派性格有密切關係，他說：「我自問演技未算爐火純青，仲有好多空間要進步同學習，公司每次畀機會我去演唔同角色，我都會好好把握。我唔羨慕人哋一步登天，萬一畀個重要角色我演，我演唔嚟嘅話，最終反而令自己由高跌番落嚟，到時真係想翻身都唔得，循序漸進嘅時間係長，但我認為自己仲花得起。」
16年的演藝生涯，阿廉最自豪是自己的工作態度，他口響地說：「無論工作時間幾唔固定，數得出我遲到唔夠10次，我認為係尊重份工作最重要嘅一環。」
問阿廉覺不覺得操生殺大權的無綫高層曾勵珍和樂易玲偏心？他說：「珍姐同樂小姐好公平，我之前機會唔多，或者佢哋認為我未掌握得到，坦白講呢幾年嘅機會都係多咗。我係一個知足嘅人，抱嘅工作態度係今日要做得比噚日好，不斷向前進步，我相信觀眾嘅眼睛係雪亮。」
付禮金拒倒貼
雖然阿廉不是大富大貴，嚴格來說是打工仔一名，因為女友姜依蘭懷了7個月身孕，所以被迫打亂結婚生仔次序，難得新潮岳父姜大偉非常接受，有報道指阿廉沒付禮金便迎娶姜依蘭過門，岳父又倒貼百萬嫁妝，阿廉澄清：「我有畀禮金，金額多少毋須交代，岳父養到個女咁大，我點可能就咁娶咗佢返嚟，我要對得住人、對得住自己，唔通又食又拎？呢次我哋嘅婚禮係簡單，唔算豪華，勝在溫馨，而且冇一樣嘢係搵sponsor（贊助），完全係我能力範圍。Elaine嫁得畀我，都知我嘅能力，我𠵱家雖然仲係租屋住冇樓揸手，但我承諾日後會搵多啲錢，畀佢同BB過好日子，我一定唔會辜負佢哋。」
李琳琳訓示切忌縱仔
曹永廉上月底與姜大偉長女姜依蘭（Elaine）奉子成婚，二人的愛情結晶品將於明年2月出世，雖然已照得BB的性別，但他們堅持保守秘密，直至BB誕生才揭盅。
捨不得體罰
為了迎接曹家小生命，阿廉近日除了搏命賺奶粉尿片錢外，夫婦又四出向已為人父母的友人討教心得。他說：「上一代嘅父母，思想好傳統，主張體罰子女，不過Elaine喺外國長大，岳父（姜大偉）佢哋對仔女採取自由開放態度，好尊重仔女嘅決定，我覺得岳父岳母都教得3個仔女好好。我諗將來教仔會以溝通為主，不過父母同仔女之間仍然要建立一份尊嚴，呢個係過來人陳錦鴻畀我嘅貼士。」對待子女是嚴是寬，一切言之尚早，阿廉唯一肯定是不捨得體罰自己的小寶寶。
夫妻唱雙簧
準外祖母李琳琳平時留意到阿廉和依蘭連家中兩頭愛犬都錫到燶，她已訓示阿廉將來不可用縱犬一套教仔，阿廉說：「或者到時我扮演家中惡人角色，太太就做好人，畢竟子女係同媽咪親啲。Elaine嘅學識同思想又叻過我，相信由佢全力教仔，BB大咗一定可以做個有用，同對社會有貢獻嘅人。而我呢個爹哋就主攻賺錢，盡我最大嘅努力，畀Elaine同BB過幸福同舒適嘅生活。」
