嬲到出面　Sharp得有層次

雖然《史密夫決戰史密妻》即使落畫已有一段時間，對睇過或未睇過嘅人來講，印象最深刻可能仲係嗰張型男索女宣傳海報，而推出DVD版時亦好順理成章地用來作為DVD封面，而最新推出Blu-ray版封面亦沿用呢個相同設計，可想而知幾咁深入民心，對畢彼特同安祖蓮娜祖莉Fans來講，高清Blu-ray版就更能欣賞到偶像表現！

記者：許福合

子彈橫飛

《史密夫決戰史密妻》唔算大玩特技嘅電影，前半場大部份戲都係描寫男女主角戲份居多，所以畫面上亦比較平淡，不過男女角都係靚仔靚女，睇落自然養眼好多，而後半場主要係槍戰連場，呢個時候就比較能見到BD聲畫方面高水準。前場因為無發揮空間，好似睇緊DVD一樣，而後半多場飛車槍戰，觀眾可以見到子彈橫飛，聲音幾邊走，極有現場感。而畫面方面，可以留意畫面光位，見到效果柔和，光位亦有一定層次感，唔覺有爆光嘅情況，而暗位效果就唔算突出，不過已比DVD版時好，相信係因應畫面調整所致。

■兩人於一次度假時認識。

■外人眼中，他們係一對完美夫妻。

■畢彼特閒時愛玩自由搏擊，不過被打居多。

人物靚又清

因為古仔都係男女主角對決，所以主要戲份都集中喺他們身上，對觀眾來講驚喜唔多，而且有好多講唔通之處，不過對因為封面而吸引來睇觀眾，應在預期之內。而BD版值得留意之處，係利用BD畫面高清特點，人物面部表情都非常清楚，銳利度高，好似後半兩人打到血流滿面，用BD上睇真係好似見到流緊血一樣，真實感強，可見主角們也擦出火花，有唔錯化學反應。整體來講，《史密夫決戰史密妻》BD版質素屬於中上，雖然故事唔算太精采，不過男女主角都叫交足功課，係一套唔錯消閒電影。