可能你一睇題就彈句：「搞錯！8人車點斯文點放縱呀？」真係唔好意思，試過剛剛到港嘅全新本田Stepwgn之後，我同模特兒Ivy都覺得揸佢返工、去蒲、同成家人成班Friend輕鬆WeWet都無問題，一部車仲要係8人車襯咩Look都唔遜色，呢種震撼都係第一次。
記者：梁美甜
攝影：王文忠
模特兒：Ivy
日出而作 日落而Wet
要揀一款可以揸返工又可以同屋企人去玩，又或者成班朋友去Wet去蒲嘅車，相信好多人都不約而同揀部歐洲型房或型爆四驅，點都無可能諗到揀部日本八人車！之不過型得起嘅房車同四驅嘅價錢同樣貴到飛起，仲隨時係大c.c.大食唔慳油㖭。
11月尾至到香港嘅本田Stepwgn雖則係一部8人車，但佢外形一啲都唔娘，仲有條貫穿車側嘅CharacterLine，畫龍點睛令整部車型得有風格，嚟個斯文打扮返工見客都無問題，轉個Wild啲打扮估唔到都Match得到，最盞係8座位成班朋友浩浩蕩蕩熱熱鬧鬧去癲去蒲，放縱一晚都開心；就算正正經經成班女人去Shopping都過癮㗎！
啱Trend又「辣」8人車
話全新Stepwgn8人車辣並非指佢性能而係指佢真係好新鮮熱辣，於11月尾剛剛到港咁話啫！話佢啱Trend完全因為佢得2.0配備i-VTEC環保引擎，又符合香港政府認可嘅環保車，食晒環保呢個Trend。
另外，時下家庭大多係3至4人小家庭，8座位就算唔使坐咁多人都騰出空位俾成家人郊遊掃貨時置物；仲有𠵱家好多年輕人都有養寵物習慣，Stepwgn空間大超多置物位夠擺嘢之餘，本田仲有所謂HondaDog嘅額外配件，好似動物廁所、毛巾等等全部原廠製，Optional配置即可。所以話呢部新到暈兼慳錢慳油嘅環保8座Stepwgn，真係啱Trend到暈！
外內小改更型更爽
第一眼見到新Stepwgn覺得佢好Sharp好Charm，原來係因為用咗08年新炭灰色所致，顏色偏沉但獨特，陽光映照之下閃亮而具立體感。至於比上一代有咩唔同，坦白講唔仔細睇真係發覺唔到，好似話外形上頭泵把立體咗更具骨感、胎軨及尾燈轉咗；車內就換上真皮座椅、6格磨砂天窗換成6格活動式開合3天窗。最盞鬼嘅係中控台有個LCD芒，後波泊位影像當然唔少得，點知開緊車，個芒都有影像，係咩？車前路面情況囉！照計我揸車實睇前面路面啦，個芒唔通唔係俾我睇而係俾中排同後排乘客睇前面路面情況？總之好搞笑！
反而新增設嘅日間安全行駛燈就實際得多，位於霧燈側屬LED燈，只要部車行緊佢都會自動着，山路彎路停車場陰暗地方最有用，行人同車輛都知道你部車嚟緊，大大提高安全性。
規格表
引擎：1,998c.c.直4i-VTEC
馬力：155ps/6,000rpm
扭力：19.2kgm/4,500rpm
傳動：4前速自動波、前輪驅動
查詢：合群汽車（28278622）