直資、私立小學一向不愁資源，反觀官、津校等獲政府有限度分配，當然輸蝕。但現時津小所得的津貼資助已比以前靈活，特別計劃撥款範疇多，IT、閱讀、語言等各方面發展都可申請資助。馬鞍山靈糧小學陳校長話︰「資源視乎點運用啫，不少商業資助，如狗教授英文課程，令學校付出嘅成本近乎零，但學生就學得好開心。」
嚴選老師強攻語文
相對官小，津小在請人方面自由得多。官校由政府請人後分配到需要人手嘅學校，但津小可獲的政府資源就自己話事。好似小學嘅NETTeacher通常得1個，靈糧認為1個唔夠請多個part-time；另外，初小推行普通話教中文，請人時嚴選普通話過基準兼要中文科出身才合資格。陳校長好自豪學校在語文方面成績不俗，第二屆小學生中英文即場作文比賽中勇奪6個獎項，英文方面仲攞咗個「香港傑出學生詩人獎」。
「我哋同李寶椿國際學校合作，佢哋派同學幫我哋嘅拔尖班補習，又一齊搞聖誕聯歡。語言根底好先可以將思維清晰表達同發展，呢個係好重要嘅生活技能，必要重點培育，盡力營造自然嘅外語教學環境。」
記者︰劉昱蘭