喺無綫播緊嘅韓劇《茶煲阿四》，令女星韓藝瑟喺香港人氣急升，阿Deep有時都希望好似劇中嘅佢咁，失咗憶都仲咁惡死鬧人。《茶》劇中嘅韓藝瑟由豪宅搬到去烏煙瘴氣嘅屋企住，原來現實中嘅佢都感同身受。阿Deep喺網上分別搵到韓藝瑟喺美國同韓國嘅屋企相，的確有天堂與地獄嘅強烈對比。
媲美公主睡房
韓藝瑟喺美國洛杉磯長大，曾經就讀當地嘅韓人學校。佢喺美國間屋佈置得極為華麗，單睇大廳內嘅傢俬就知唔係普通貨色，而且大到可以開幾圍枱都唔覺迫。再走入佢間閨房，無論牆紙、窗簾抑或床單都係花朵圖案，所以韓國網友就形容為媲美公主嘅睡房。唔怪得韓藝瑟一年都要返幾次美國，探親兼休息吓啦。
至於韓藝瑟喺韓國間屋，雖然唔算好核突，但就比美國嗰間細好多倍。當中睡房嘅情況最為嚴重，畀人又細又亂感覺之餘，啲衫褲鞋襪仲周圍擺，睇嚟韓藝瑟平時都好少執屋喎。
另外，阿Deep又發現網上有佢喺閨房瞓覺嘅相，但原來嗰間只係佢喺新片《用意周到申小姐》嘅道具屋，欺騙咗唔少網友。
版主：網盜王尊尼Deep
本欄逢周一至五刊出
美國屋： http://tvzonebbs3.media.daum.net/griffin/do/phoshop/read?bbsId=A000009&articleId=129686
韓國屋： http://tvzonebbs1.media.daum.net/griffin/do/photophoto/read?bbsId=A000004&articleId=190408