近日屢被狠批作風豪放的整容三嬌Freeze，又有驚人新搞作。據知她們將於日內齊齊遷進月租30,000元、屋內裝有webcam的灣仔香閨，供fans網上欣賞演期長達1個月的私房真人騷，今次三嬌金睛火眼再辣網民，為宣傳新碟作最後一擊。
整容三嬌Freeze憑《金睛火眼》的養眼MV，獲近15萬網民上YouTube捧場，專辣網民的三嬌食過翻尋味，一於玩得更大，決定轉玩互聯網真人騷，讓fans任睇唔嬲。
據知Freeze為谷新碟而將私生活擺上網，晒冷宣傳作最後一擊，日內其經理人公司將安排她們齊齊搬竇，入住月租30,000元、位於灣仔的800呎單位，屋中放置多部webcam，拍攝她們日常起居飲食，網民可透過互聯網直擊三嬌私房生活。
分頭做家務
向來獨立的成員甄詠珊將獨佔一房，餘下兩嬌陳樂榣和石詠莉則同房孖鋪，陳樂榣透露以前與石詠莉住酒店同房，知道石詠莉睡覺時會說夢話及尖叫，她笑說：「Sukie（石詠莉）發開口夢會狂嗌，我同佢瞓着時都會踢人，鬥踢囉。三個中最有潔癖係我，聞到廁所臭我會嘔㗎，希望Sukie用好啲啦。」
陳樂榣又表示大家會分頭做家務，她說：「最鍾意鬧人嗰個都係我，我比較火爆，平日搭車錢我計，整頭化妝我計時間，到時要有人負責主持吓間屋，我諗我都係做呢啲㗎啦。」
帶公仔陪瞓
甄詠珊則說：「間屋係得個廳有cam，房同廁所都冇，所以唔會冇私隱，只係有少少擔心大家相見好同住難，會有好多拗撬。」她表示除了帶已陪瞓11年的麥兜毛公仔往新屋外，最愛入廚的她更會帶齊沙煲瓦罉及柴米油鹽玩煮飯仔，大頭蝦的她更事先張揚說：「我冇乜手尾，會成日唔記得閂燈熄火。」
採訪：朱倬誼
攝影：陳偉權
化妝、髮型：JanSuen@OneMakeUp
服裝：Replay