【上海直擊】湯唯噚晚專程到澳門出席第13屆亞太電影博覽頒獎禮，接受大會頒發本年度亞洲女演員大獎，今日佢又會轉飛台灣，準備聽晚參加金馬獎電影頒獎禮，佢憑電影《色，戒》獲提名最佳新演員同最佳女主角，如無意外，呢兩個獎都會係佢囊中物。
湯唯幾年前仲係寂寂無聞嘅內地新人，拍一個廣告，只係收幾百蚊人民幣，𠵱家當然今非昔比，單係服侍佢嘅工作人員都有4、5個。就好似上月底，湯唯喺上海音樂廳拍化妝品廣告，佢嘅造型同《色》片中嘅角色好似，拍攝場景都似曾相識，有啲抄襲《色》片之嫌。
主動提議改動作
導演吩咐湯唯步行上長樓梯，然後不經意咁將披肩滑落在地，不過湯唯覺得效果唔太好，反提議手挽披肩上樓，減少不必要動作，最後導演接受佢嘅意見。湯唯嘅主動同聰明，令工作人員非常欣賞，一啲睇唔到正面嘅鏡頭，廣告公司都安排替身代拍，完全唔勞煩佢，人紅咗，待遇都果然唔同。不過經理人公司似乎對她過份保護，有啲影迷想走近影相都被極力勸阻，搞到在場啲fans好冇癮。
