牽牛花、小喇叭？留聲機呢個名詞真係久違了！𠵱家乜嘢都講HD、又要數碼化，突然黑膠唱盤大回歸，反璞歸真行最原始的Analog，感覺是另一種極Raw又窩心的老調風味；要懷舊當然要有點代價，機價$18,880、再加6呎高機身，絕對係非富則貴的潮人玩物；睇真啲！原來仲有5.1DVD同AudioCD等播放功能，老掉牙的留聲機，在今天都要資源增值囉！
記者：朱崇德
攝影：楊錦文
Model：Naomi
兼聽又睇DVD
香港人玩黑膠，普遍感覺係較小眾，但須知在美國、日本呢啲地方，玩黑膠捽碟、出新款唱機，基本一直冇停過，最近又從日本嗰邊吹番呢股潮風過嚟！呢部Morisaki嘅Angel系列，就係出自日本仔手筆，外形一睇就知玩經典仿古「留聲機」，主軸是機頂黑膠碟盤，細看機身，竟然還內置有一個「食碟式」光碟盤，兼玩DVD、VCD、MP3、MP4、PictureCD等多種不同碟種，真係幾多嘢玩吓！
內置Sub-Woofer玩環迴音效
全機最搶眼係佢個牽牛花小喇叭，再加機身兩側設有左右聲道喇叭，分析能力相當唔錯，而且設計成由上而下、由左至右，感覺予人一種十分開揚的音場感覺；更特別是唱機底座，設計成手繪多筒櫃的設計，除咗方便大家收藏唱片及附件之外，底部還暗暗收藏了一個Sub-Woofer，所以不論睇碟或聽歌，都更能表達出廣闊的高低音域。另外，機背還設有5.1聲道輸出、同軸及AV輸出等插口，用以接駁其他音效設備，擴展更闊的視聽空間。
Twins都出黑膠！？
黑膠只係超級音響發燒友玩物？完全錯晒！黑膠除咗《無間道》嘅蔡琴老歌同二手發燒碟，其實近年都有「非典型黑膠歌手」出碟！好似近期大熱嘅有Twins六周年紀念版的《TwinsParty》（$268），今個星期仲最新返咗張信哲《雪國八月》（$218），至於一啲舊黑膠經典如譚校長《愛的根源》（$198），都有嚟個舊模新印；黑膠新潮玩之風，正是剛吹起風來。
地球儀360°黑膠盤
黑膠唱盤傳統畀人感覺，係一種冷調的四方盒，今次MorisakiJW2909一破傳統，將黑膠功能與地球儀呢類家居擺設大玩Crossover；完好未開時，是一個古舊的木製地球儀；一開內裏亁坤是一幅古色古香的星座圖，由於視點被轉移，最後大家先發覺它原來亦是一部黑膠唱盤。
由於玩風味，機身除電源線，其他諸如喇叭、接線插口全不見蹤影；但細心觀察機底氹氹圈有數排有如通風口的孔道，竟然是喇叭出聲口，壞處是一隻喇叭驅動，聲效會較侷促，不過由於360°都有喇叭口，就變成360°全方位演奏，放在客廳中心，真係每一個角落都聽到。
JCSHOP（31022783）
地址：香港銅鑼灣時代廣場9樓919號店