競選爭票之時，葉劉淑儀曾埋怨傳媒不公，於是有人誤以為葉太只睇一張報紙，就係全力支持陳太嘅《蘋果日報》。葉太眼中只有《蘋果》？唔係啩？如果佢睇晒全港報紙，就知道「偏幫」葉太自己嘅，不止一張報紙，起碼四至五張啦，《蘋果》以一敵「幾」，葉太仍然埋怨傳媒偏幫陳太，對其他幾張報紙唔係幾公道。
舉個例，追問陳太十成按揭一事嘅，就唔止一張報紙啦。睇嚟喺未來八個月，陳太任立法會議員期間，民建聯議員會配合幾份報紙，不斷揸住十成按揭呢個題目，找陳太麻煩，搞到陳太不得一日安寧。
左丁山唔記得金管局幾時限定銀行客戶做按揭只得七成，不准逾越。有老友講，係一九九三年陳太買玫瑰新邨之前。但係金管局嘅按揭貸款指引主要係防範炒樓，強烈提醒銀行注意按揭風險，只係指引啫，並唔係法律，銀行按照不同貸款準則借錢畀客戶，有自己一套防範風險準則，並唔係機械化咁樣做七成按揭就會冇壞賬，借十成就有壞賬。九七金融風暴之後，好多人借七成按揭都還唔起錢啦，你估借七成係防止壞賬損失嘅金科玉律咩。
銀行借錢畀人，最唔鍾意淨係揸住層樓，最緊要睇借款人之還債能力，知道借款人嘅每月收入（是否夠高），收入來源（是否穩定），每月支出以及資產淨值（即借款人之現有總資產減去總負債之淨額），有齊呢啲資料，銀行直情可以考慮可否借出一筆無抵押貸款㖭。又有一類就係將屋契擺低喺銀行，預先簽訂聲明話賣樓須事前得到銀行許可（approval），咁就可以借款，毋須正式做按揭，借款人如要賣樓，一定要還咗錢先至可以攞番屋契。
銀行借款方式與抵押品，甚多變化，件件不同，只有銀行與借款人先至知道，如有違反銀行政策及監管當局法規，自會有銀行內部稽核及銀監稽核人員查到出嚟，幾時輪到啲不知情記者話人違規呀？如有人話銀行故意鬆章，向政府攞好處，又係搵嚟講，香港銀行何須巴結高官吖，你估香港係台灣、大陸或甚至拉丁美洲？