悶棍相當11月，和波鞋市場一樣，各路Figure玩具冇件睇得上眼。但一到12月，多件新品叫人拍案叫絕。12"Figure中，焦點非HotToys×How2Work預備推出的《投名狀》莫屬。而超合金界，Bandai再次發功，$1,400盒《天威勇士》依然大把人爭住買。所以話，今日玩具唔係畀細路玩，男人變晒大細路，Kidult生意最好賺。
記者︰陸俊雄
攝影︰林栢鈞、陳陶鈞
兩大火炮Figure公司首度合作
HotToys的Figure衝出香港，大家都有所聞。至於How2Work亦屬土炮Figure製作公司，出品包括奈良美智、《東京暴族》和《頭文字D》等。HotToys主腦Howard︰「其實公司成立冇耐已經和How2Work合作，大家交情很好。但今次《投名狀》的版權係由How2Work簽返嚟，阿Dee見我好有興趣，於是正式首次作聯名製作。」港星肖像權一向天價，How2Work主腦阿Dee說︰「《投名狀》的版權係整套電影咁簽，所以比起逐個簽平，但實際數字不便透露喇，哈哈。」Howard︰「對比上次做周潤發，外國電影的版權費比起香港電影貴。」
獨缺李連杰
3位主角中，金城武第一次出12"Figure，今次更一次過出兩款。劉德華Figure推出過《全職殺手》、《愛君如夢》。至於李連杰，由於近期有Enterbay出過《霍元甲》，令《投名狀》出現3缺1，「樣辦做好先知李連杰造型出唔到街，肖像權有問題，加上和《霍元甲》Figure的推出時間又相差太短，要簽上簽唔容易。」阿Dee都說︰「所以今次龐青雲只用作宣傳，最後不作發售。」
Howard雕頭Dee做衫
這次分工，HotToys負責雕頭、手和製作配件，How2Work後者負責戲服。Howard坦言過往製作都只係對住劇照。但今次有電影公司全力支持借出戲服和道具等，只用了兩個月極速完成︰「劉德華（趙二虎）起初比較青靚白淨，電影公司話劉德華靚仔樣之前出過，今次亦無理由同金成武一樣咁後生。劉德華自己都睇過，佢想個Figure面相精神啲、豪氣啲。」
創作人點睇？
廣告人浩仔︰「邊個話劉華唔似，角度問題啫，我覺得佢對眼最似。」
8Five2Kenny︰「我覺得金城武做得唔錯，加上又未出過佢嘅Figure，幾值得收藏。」
售價︰各$930
預訂價︰各$890
推出日期︰08年1月
查詢：ToyHunter（23884677）
旺角兆萬中心216-218舖