香港華洋雜處，衍生出不少特色文化，茶餐廳是其一，食物中西合璧，炮製出獨特風味的「豉油或茄汁西餐」，尤其一個下午快餐已經突顯這個特色。天天即擦即寫的白板上，經常出現沙丹豬扒、匈牙利牛肉飯、拿破崙意粉、免翁牛柳飯等，再加個是日餐湯如羅宋湯、周打魚湯等，名目上，已帶你飛越九宵吃一頓西餐，但有幾正宗，當然心中有數。
記者：張一豪
攝影：梁細權、楊錦文、周旭文
正版A貨比拼
香港人習慣，做乜都要快，午餐三扒兩撥，如果頭上有個蓋，可能有人會直接打開倒入肚，總之填飽繼續搏殺就算，所以茶餐廳的快餐往往正中下懷。不過午飯時間亦是半日工作的小歇，找個地方食餐舒服茶飯，一點都不過份。剛開業不久的Misto，在意大利文有「混合」之意，主打正宗歐陸和東南亞菜式，並將東西滙聚。老闆Michael話，「晏晝餐飯不妨Relax吓，俾個腦停一停，個人都襟捱好多，而且好多人都慣咗食快餐的變種西餐，我哋一於炮製最正宗的沙丹豬扒、拿破崙意粉等俾各位試吓乜嘢先係西餐風味，唔使再食A貨餐。」
沙丹豬扒：
茶餐廳一般是茄醬加太陽蛋及火腿，有指沙丹是太陽蛋，出處卻無從稽考。Misto的沙丹豬扒，是維也納豬扒的做法，用兩片薄豬扒，中間夾火腿和芝士，之後包蛋漿、麵包糠炸，下面配意大利肉醬。
沙丹豬扒餐$58（a）
豬扒僅熟，入口很嫩，火腿增加咬感，熱力逼溶芝士，加薯寶同吃，十分飽肚。因為製作比較麻煩，每日限量供應。
沙丹豬扒飯$27（b）
簡單講，是茄汁豬扒飯「加頂帽」，但一定要太陽蛋才叫沙丹，兩塊豬扒成隻手掌咁大，抵食夾大件。
匈牙利牛肉：
原是叫Goulash的傳統匈牙利燉肉，通常以甘笋、薯仔、洋葱等一起煮，當中不能缺少名叫Paprika的紅椒粉。精髓是保留牛肉的嚼勁，微甜、微辣的口感，上桌時加SourCream最正宗。
匈牙利牛肉跟白飯$58（a）
加入正宗的匈牙利Paprika紅椒粉，微辣，牛肉Size一口一啖。因怕一些人吃不慣，不放酸忌廉。
匈牙利Paprika紅椒粉，少辣，微香。
匈牙利牛肉飯$28（b）
洋葱、番茄、火腿、蘑菇等做成茄汁底，加入燜腍的牛腩再煮入味，是碟材料豐富的碟頭飯。
拿破崙意粉：
聽講拿破崙意粉Napolitana其實是英文的Neapolitan，意思為「拿玻里的」，泛指源自拿玻里（Napoli）以番茄為主的醬汁，故稱作拿玻里醬汁，後來被港人叫做拿破崙醬汁。
拿破崙意粉餐$48（a）
自製的「拿玻里醬汁」番茄醬，加入九層塔及初榨橄欖油炒製，清香有茄味，意粉亁爽。
拿破崙意粉$27（b）
亁炒茄汁意，配料有洋葱、火腿、牛柳絲等，即叫即炒夠鑊氣，入口酸酸甜甜。
免翁牛柳：
法文是Filletmignon，mignon有美好含意，fillet解作肉片，主要用牛腰肉及包裹在牛腹腔中少運動的肌肉，故肌肉纖維不粗，肉質鮮嫩。通常是薄片的牛柳肉，才叫免翁。
免翁牛柳配意粉$68（a）
加拿大牛柳，配蘑菇汁，不怕較生的話，可以做三成熟，因為夠薄，入口十分軟滑。
免翁牛柳飯$28（b）
快餐薄牛扒，配蘑菇燒汁，扒有牛味唔韌，蘑菇汁香，送飯最啱。
其他選擇
芭堤雅燒雞拼椰汁飯$58（a）
半隻泰式燒春雞，由東南亞菜高手Ken主理，跟那個加入泰國香蘭葉汁的椰汁飯絕配。
西班牙豬扒火腿飯$23（b）
以洋葱、番茄、青椒、蘑菇等做汁，配兩塊大豬扒。附送餐湯、熱飲，凍飲加$2。
是日餐湯
Mistro跟餐送湯，除咗中西湯外，還有泰式選擇。這個椰汁、香茅加雞肉同煮的湯，充滿椰味雞夠滑，入口絕不下忌廉湯。
茶餐廳有Say
萃華茶餐廳84年就在牛頭角開業，一直都受到附近地盤及工廠區員工追捧，午飯時間十分旺場，「做茶餐廳下午好踢腳，加上人手有限，當然就無可能好似大餐廳咁精緻，但我哋勝在抵食，快靚正，食法唔同，講到即炒，我哋肯定夠鑊氣。」
食客有感
「沙丹豬扒、拿破崙意粉大概知係乜！不過未試過正宗版。」
「好少去茶餐廳，啲豉油西餐唔係咁啱口味。」
（a）Misto（23113298）
地址：尖沙嘴加連威老道46-48號恆隆銀行大廈一樓
營業時間：星期一至星期六12:00nn-3:00pm，6:00pm-11:00pm；星期日6:00pm-11:00pm
（b）萃華茶餐廳（27563488）
地址：觀塘牛頭角道160號地下
營業時間：7:00am-11:30pm