每年臨近年尾，華華都會收到唔少月曆，而月曆嘅設計好多時會同公司業務「掛鈎」，咁先至可以收宣傳之效。好似華華噚日收到機管局送嚟嘅08年月曆，覺得佢哋好有心思，月曆封面用硬皮做成皮篋咁款，仲有個小手挽，設計十分神似，封面寫住「拾．回憶」，原來下年係香港國際機場啓用10周年。
華華翻開月曆，見每個月份嘅圖片都好有意思，先記得呢10年嚟機管局都經歷咗好多嘢。月曆裏面嘅12張相，係特別為紀念過去10周年而篩選，紀錄晒機場發展，例如1月份由喺赤鱲角開山拓地開始，到開幕禮、海天客運碼頭啓用、接手管理珠海機場兼同杭州蕭山國際機場合作，11月份就由近百名員工嘅照片組成，相信佢哋都花咗好多心思。