下個禮拜起開始休假，展開退休生涯嘅渣打銀行（香港）總裁蘇利民，噚日臨別秋波，同一眾銀行beat嘅老記歡聚。蘇利民04年中嚟香港履新，後嚟接棒過檔獅子行嘅王冬勝，掌舵渣打香港，佢話離開香港返倫敦後，肯定會好掛住香港同埋呢度嘅朋友，三年多喺呢個國際都會工作，唯一令佢覺得遺憾嘅事，就係應該更加早嚟香港工作，最好早十年嚟㖭。
雖然唔少報告都話，香港競爭力正在滑落，不過，蘇利民口中嘅香江，係全球獨一無二嘅精采都會，香港人嘅拼勁同埋熱情，佢話三十年從事金融界生涯，飛遍世界唔少角落，都難望香港項背，事關香港人做嘢，永遠唔會話「goodisenough」，直情係做足二百分。
戴維思叮囑要做功課
香港傳媒亦令佢非常難忘同欣賞，佢噚日就笑笑口咁話，嚟香港之前，集團主席戴維思（曾任渣打集團東北亞執行董事兼銀行公會主席）叮囑佢，記得做好功課先見記者，特別係最優惠利率跟港元同業拆息息差變動，更加要貼市，事關本地記者出名夠耐力，問題亦傾巢而出，追你九條街都要問到答案為止。
喺蘇利民帶領下，渣打香港連續四年錄得盈利新高，年屆六十嘅蘇利民，雖然仍然龍精虎猛，不過家庭始終係最值得珍惜嘅，所以佢選擇退下來，返英國老家，留番多啲時間陪家人，特別係仲喺大學求學嘅子女。不過，佢話日後都會成日嚟香港，仲會伺機購置物業。