沙田施小姐噚日向網友推介阿里巴巴（1688），話自己喺35蚊時買入，不過，隻股喺上個禮拜升到近41蚊時，佢並冇沽出，噚日跌到得番32.9蚊。施小姐嘅目標價定喺45蚊，對於呢個價，英皇證券研究部主管沈振盈笑謂：「你35蚊買，市盈率已經200倍，上到100蚊，市盈率都係六七百倍，又如何啫？都係畫多個零之嘛。」
盈利難支持高市盈率
被問到點解揀阿里巴巴，施小姐話：「聽人講佢喺大陸好出名，會員費收入又高。」孫柏文直言：「阿里巴巴冇基本分析好睇，但好在貨源歸邊，可以好容易被炒上。」
沈振盈就話：「呢隻股票成二三百倍市盈率，要保證連續幾年高增長，盈利要有幾十億至過百億，先可以用呢個市盈率計，對科網股嚟講好難，因為有太多競爭對手。」聽到專家分析，施小姐開始盤算好唔好先止蝕，沈振盈好大反應：「你𠵱家問我斬唔斬即係跣我啫！呢隻股票主要炒供求㗎啫，股價上番去都唔係冇可能，𠵱家沽咗你梗鬧我，不過，如果股價跌破30蚊好先計數。」
想入番「神奇股」港機
對虛擬嘅網股有興趣外，施小姐原來都會玩吓實力股，今次俾佢揀中嘅就係港機工程（044），佢形容港機係隻神奇股，「喺180蚊入貨，股價6、7蚊咁升，最衰聽間大行講話到價，咪喺214蚊放咗，點知當日即刻再升十幾蚊，𠵱家諗緊好唔好再入。」沈振盈話：「呢隻唔係神奇股，升有原因，佢係香港獨家經營飛機維修，又發展內地業務，加上有穩定派息，最重要係市場貨少，股價好易被推上。」
新銀（988）
炒轉型變蟹貨
西環馬小姐話早前聽到消息，新銀集團（988）會轉型煤炭股，即刻喺2.73元入咗貨，點知隻股喺高位回落，跟住一直冇止蝕，就咁做咗蟹。新銀噚日收報2.24元，馬小姐賬面計即係蝕緊18%。
沈振盈睇新銀嘅基本因素，就覺得冇咩吸引，「佢都係從事物業管理、投資發展同酒店，過去走勢，一直維持喺個半到兩個半左右，技術上動力不足，基本係行上落市波幅。」沈大師認為，趁佢近日彈高少少，馬小姐應該考慮計吓數，（止蝕）當然有一定痛楚，但亦需要認真考慮佢係咪真係有前景，值得去揸，「因為當日你入市係炒消息，消息一過，股價跌破位，唔知幾時至有消息可以挨番上去，與其咁被動，不如計一計數先。」
交行（3328）
按揭旺受惠少
西貢Peter噚日推介交通銀行（3328），覺得如果美國減息，香港都會跟住減息。Peter話：「行過街都知，𠵱家地產好掂！」孫柏文質疑，地產市道好同交通銀行有咩關係？Peter解釋，地產帶動按揭，按揭帶動銀行股價。沈振盈反建議，叫佢考慮吓中銀香港（2388）：「香港樓宇按揭一哥係中銀香港，交通佔嘅比重好細。」
Peter再爆料，話之前已經收到風，知道港機工程（044）會被炒上：「佢哋內部員工知道會起。」沈振盈亦表示：「飛機維修呢行，過去名譽好緊要，我覺得港機絕對有競爭力。」
國航（753）
睇12蚊都幾盡
何文田David打上嚟推介中國國航（753），話自己10蚊已經買咗，睇佢可以升到13蚊，𠵱家係「仲未到位」。
沈振盈話：「之前頂位係12蚊，我覺得暫時可以將目標價放喺12蚊先，因為41倍PE（市盈率）都算貴，如果同外國航空公司比就貴，但係佢有增長潛力；最重要睇油價，由07年頭58蚊升到𠵱家接近100蚊，呢幾個月對佢嘅profitmargin實有影響。所以睇12蚊嘅頂位都幾盡吓嘞。」孫柏文補充話，燃油加價，費用未必可以全部轉嫁乘客。沈振盈最後表示，自己最鍾意嘅航空股係國泰航空（293）。
中外航運（368）
預半年浮上水
沙田馮小姐前日打嚟話之前0.156元入咗中銀瑞銀call（7984），後來曾經跌到去4仙實際上已經心死，點知噚日中銀香港（2388）表現大勇，隻call升咗五成到一毫半，今日好興奮打嚟報喜，雖然仲未返到家鄉，但如果聽日升到去兩毫子都想放咗佢，沈大師叫佢：「炒輪要止賺亦要止蝕，中銀10月份時浪頂係近23蚊，即係你隻輪嘅行使價，亦即係會有好大阻力。」
馮小姐對於中外航運（368）一直潛水大惑不解，佢話自己IPO抽唔到，第一日掛牌就喺8.2元入，點知又變蟹貨。沈大師叫佢可以揸吓先，「呢隻要磨你時間綁你資金啫，新股變半新股後，你要預4至6個月，佢先可以返上去，因為頭6個月有禁售期。呢隻嘢亦都唔算特別吸引，上市定價亦貴，而且始終油價要落去先對佢有利。」
今日嘉賓：
亨達集團研究部董事黃敏碩
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
每日收市後4:30pm
http://appleactionews.com/features/finance/
＊以webcam參與節目者，可額外獲贈KFC$100現金券
