電盈（008）舊年賣盤不成之後，坊間盛傳佢哋個主席、真主黨（真民主黨）精神領袖李察，經已同代表阿爺嘅partner網通（906）反枱，事關當日單deal，由開賣到搞喎埋，網通一紙「唔想8號仔落入洋人手中」聲明，好大程度係壞咗李察大事嘅關鍵，而網通亦唔like有人玩嘢。咁網通同李察𠵱家嘅關係，又會係點？根據網通董事長張春江噚日話：「係章回小說，𠵱家諗緊第二章……」
查實件事係咁嘅，張總早排喺大陸接受訪問，提到8號仔賣盤單嘢，佢話：「我建議咱門寫章回小說，還可以留一點懸念。」噚日晨早網通股東會，佢繼續同香港傳媒高度配合，講解呢本章回小說，佢話：「第一章的故事已經寫完，第二章呢還在想。（會寫不成嗎？）也有可能。」
故事發展到邊度
台上講完，台下張總補充：「寫小說不是我一個人的事，要兩個人共同努力，有人不寫就可能寫不成，現在呢就像兩個人坐在屋子裏面想（那另外一個人是誰呢？）你自己猜吧！（猜不到，你是說李澤楷吧？）你猜也猜得到啦！」原來，張總都好似李察咁，鍾意玩你估我唔到，而且功力仲可能喺李察之上！
咁呢個章回小說會唔會好似《三國演義》咁高潮迭起？第二章又幾時有得睇呢？係咪等於第二次賣盤？唔知道！但睇番舊年單刁喎咗之後，張總明顯比李察風騷同高調，一時又話同李察仲係老友，過時過節互相「問候」；一陣又話兩間大企業唔係玩煮飯仔。
華華感覺，家陣張總一方已反客為主，反而獨留某人喺屋裏面「度」緊第二章，而非兩個人一齊諗。至於被留喺屋裏面嗰位，唔知諗到邊個stage？Bytheway，最緊要唔好寫寫吓變咗《死亡筆記》就得，事關啲小股東仲等緊派特別股息。
由邂逅到攤牌
講到電盈同網通嘅恩怨情仇，真係比得上章回小說咁吸引。首先第一章就梗係──網通電盈由邂逅到攤牌。
話說05年，網通邂逅電盈，由於電盈係由香港首富超人之子李察持有，出身大戶人家，門當戶對，所以喺嗰年1月，網通就以80億銀作價，買入電盈兩成股權。
雙方一直相敬如賓，點知翌年6月，李察突然話，收到第三者提出收購電盈嘅電訊資產，後嚟證實係澳洲麥格理，之後美資新橋又加入收購。
作為電盈第二大股東嘅網通，知道李察有意將電盈資產賣畀外資，梗係反對，話晒電訊涉及敏感資產，又點會容許落入外資手。當時網通心諗，就算要賣，祖國大把錢，排隊都未輪到班外資。於是網通發聲明，「不願意看到港人擁有和管理的電盈或其主要資產狀況發生任何變化。」
呢一番言論係希望李察回頭是岸，坐低同大陸傾，點知一向「不羈」嘅李察反而話：「出售資產毋須網通同意。」咁樣俾人落面，擺到明冇偈傾，故事點發展？請看下一章。
難為了超人
李察唔請示中方夥伴，電盈話賣就賣，阿爺當然冇面，作為李察老竇嘅超人李嘉誠（圖），見咁嘅形勢當然要出手補鑊，但又知阿仔唔鍾意老竇插手，所以搵梁伯韜出面，以92億銀收購李察持有嘅23%電盈股權，希望擺平電盈賣盤風波之餘，單嘢唔會影響自己同大陸嘅關係，整喎長和系大陸啲生意。
一向有個性嘅李察，知道梁伯韜組成嘅收購財團，除咗西班牙電訊，真正幕後買家其實係李嘉誠基金，公開講：「如果盈拓（電盈母公司）小股東投反對票，我會好開心。」
結局係點？收購唔成，76.3%嘅盈科拓展小股東反對。當時華華都好好奇，梁伯韜何來有錢買得起電盈？以李察嘅智慧又點會諗唔到老竇有份？中方成單刁俾佢兩父子玩到頭擰擰，畀着你都反枱。
mailto:[email protected]