公關大姐大應邀參加助選，晨早出動，跑咗兩個站之後，有人示意佢可以離開，大姐大巴不得立即鬆人，走遲啲都怕俾候選人發覺，叫佢返轉頭也。點解唔再需要大姐大嘅意見呢？原因簡單到極，因為架競選代步用嘅Van仔唔夠位坐，有人唔想大姐大佔咗一個座位也。
離開大隊，大姐大一身鬆晒，立即買咗隻雞返屋企食飯，午飯之後同個仔去尖沙嘴行街，行到入Sogo，巡吓巡吓，見到一個英國百年老字號名牌子，Ａ牌女裝格仔外套，幾千蚊一件，大姐大與公子站立觀賞兩分鐘後，大姐大話：「呢件幾啱我着。」旁邊有一位女售貨員，貌似老練富於經驗之輩，照計好識推銷，賺番個佣㗎，點知呢位女售貨員聽到大姐大之言後，雙手互抱於胸前，帶有笑聲咁話：「娃娃裝嚟嘅噃！」大姐大聽見為之氣結，女售貨員即係笑佢老啫，立即板住塊面回答：「我着咗咪似老娃娃囉！」女售貨員知道撞板，不知所措，大姐大拂袖而去。
套用劉德華一句廣告：「今時今日咁嘅服務態度，點得㗎！」二十年前左丁山曾在大華國貨想買一件茄士咩大褸，女售貨員冷冷地回答：「件褸要幾千蚊㗎！」唔肯畀左丁山試身。呢種服務態度，在九七回歸後因生意不景，已經失咗蹤，估唔到今日重見於尖沙嘴。左丁山對大姐大講：「大概好多自由行阿嬸與表妹，識買英國名牌貨，幾千蚊一件視作等閒，人哋賣貨賣唔切，所以見到你呢啲本地燦嫂，都費事睬你！」乜唔係啫，今年某月某日左丁山行落中建大廈間Geox想話學人買番對名牌運動鞋，企咗五分鐘都冇售貨員行埋嚟，因為有三四位內地大爺用普通話猛嗌：「三雙」，「四雙」，「兩雙」，好似要掃晒幾個款色咁款，我哋港燦邊有人會招呼呀。結果就係自己知情識趣，放低對鞋就行，以後唔敢行入去。大姐大其實唔使行公司嘅，佢成日收到名店電話，叫佢落去試吓啲新貨色（newarrival），大減價時又一定及早通知佢去揀先，對佢都唔知幾好服務。不過女士總係喜歡行到邊，買到邊，估唔到會受人冷眼相待也。