沙田馮小姐喺0.156蚊買入中銀call輪（7984），目標價睇0.2蚊，隻輪喺明年2月到期，噚日跟隨正股中銀香港（2388）上升，低位反彈37%，收報0.1蚊。馮小姐問：「隻輪跌咗咁多，𠵱家反彈，究竟先走貨止蝕好？定繼續揸落去？」
英皇證券研究部主管沈振盈問佢：「你知唔知呢隻輪嘅行使價係幾多？」馮小姐答：「22蚊。」沈大師解釋：「家陣隻輪係價外，有調整壓力，究竟仲值唔值得揸，就要睇佢到期前，中銀香港嘅股價仲有冇機會上番22蚊樓上。」
食髓知味再入過
被問到點解你會買中銀call輪？馮小姐答：「因為之前有直通車，中銀會最受惠。」孫柏文追問：「點解取消咗直通車，你唔走貨？」原來馮小姐係食髓知味：「玩咗呢隻輪好耐，都有賺過，見佢回番咪再入過。」
沈大師建議馮小姐應趁𠵱家正股反彈沽貨，「當正股反彈後企穩唔升，隻輪會好快收水，記住炒輪唔可以長揸，尤其係價外輪，一定要靈活走位，正股一停就要走。」沈大師更講咗兩個買輪忠告：「第一，當隻輪由價內變為價外，瞌埋眼一定要走；第二，千祈唔好睇之前隻輪升幾多。」孫柏文就指，當股票基本因素改變，就要走貨。
駿新再跌非更抵
除咗炒輪，馮小姐亦喜歡聽消息炒股，其中一隻係駿新能源（091），「朋友嘅阿姨話4毫買好抵，後尾落到3毫覺得仲抵，就入咗貨。」駿新能源噚日收報0.27蚊，跌5.3%。沈振盈話：「呢隻係變身股，睇圖跌緊，穿兩個半就要計數好走。」孫柏文亦話：「阿姨4毫買話好抵，並唔代表再跌之後仲抵。」
另外，馮小姐亦因王軍入主金榜（172），早排喺0.72蚊買入，噚日該股收0.64蚊，孫柏文建議：「隻金榜嘅股價一浪低於一浪，應該走貨。」沈振盈亦話：「呢啲叫長命斜，如果信王軍會升，就冇分析可言。」
中石油call（9885）
AH彈OPEC唔增產
Phantom噚日又再登上螢幕，不過就唔再put，反而叫人call中石油（857）。佢見中石油A股噚日大反彈2.8%，H股又跟住起舞，飆3.8%，再加上預計OPEC唔增產，故睇好中石油短期走勢，並推薦德銀call輪（9885）。
點知孫柏文唱反調：「出口國生產已經超晒標，影響油價能力有限。」沈大師亦提醒佢要睇番基本因素：「油價如果繼續回落，中石油升極有個譜。12月有成19隻輪到期，超過一半係價外，只要（輪商）㩒住中石油唔升上15個半16蚊，大部份人都會輸錢，短期都有壓力；9885呢隻輪槓桿3倍幾唔抵博，而且好多人會賭到禮拜五，因為指數基金會尾市掃貨。」
-Phantom建議-
買入價：現價
正股目標價：$16.5
正股止蝕價：$15.0
時間：今年內
恒指call（4994）
升穿三萬先食糊
將軍澳阿聰上星期打嚟推介恒指法興call輪（4994），當時入市價係兩毫子，隻輪噚日收三毫一，所以佢噚日打番嚟報喜，仲話如果升穿3萬點而成交無番千五億，咁就食咗糊先。佢話今次有斬獲都係全靠睇住日圓，𠵱家去到110，怕佢又再拆倉。
沈大師教路：「今日下晝個市升，就係啲日圓跌番去110.5、110.6附近，但去到111都會有壓力；我睇係美元準備喺議息後反彈，一係美滙指數已經兜咗個圓底，二係兌歐元英鎊已隱約做咗個頂。每一次美金轉勢前，最後行嘅一定係日圓，呢兩個禮拜可能會再榨多浸勁嘅！」孫柏文睇番數據：「𠵱家美滙指數就76，上番去80點呢個長期嘅支持位都唔出奇。」
聯通（762）
等16蚊執平貨
西貢Peter睇報紙，見到有獨立投資者減持中國聯通（762），話都無咁快，噚日一開市聯通就裂口低開。Peter唔理消息對聯通有咩長期影響，一心只係諗住執平貨，希望可以16蚊入市，「既然隻隻都升咗，呢隻就平番些少。」
沈大師提醒：「聯通噚日裂口低開後出現咗十字星，呢個時候都係博博吓，加上近日中資電訊股轉弱，我覺得喺呢個位未必買得住。」沈大師亦唔同意Peter咁樣嘅揀股方式，「第一日（減持）未知沽售壓力完咗未；之前唔少獨立投資者大lot（手）沽貨，好似淡馬錫、誠哥（李嘉誠）、股神畢菲特、美國鋁業等等嘅清倉行動，呢個已經係一個訊號，就算沽完之後再升，都只係炒作。」
-Peter
建議-
建議買入價：$16
目標價：$17以上
止蝕價：$15
時間：2-3個月
中新（563）
PE偏低有潛力
將軍澳周小姐噚日推介中新集團（563），點知沈大師同孫柏文對呢隻名不經傳嘅內房股都無咩印象。周小姐就覺得佢只係屬於潛力型，「本身雖然唔太出名，不過市盈率（PE）偏低，土儲都有成千萬平方米，加上一路有樓盤推出，舊年盈利仲有8億幾。」周小姐見佢上番，故建議7.4蚊買入，睇8.5蚊。
沈大師話：「相較內地房地產股，中新仍可以接受，一來係佢PE唔高，都係12、13倍，又有盈利基礎，安全性算高。但要留意公司未來有咩新盤賣，唯一擔心係新盤未能及時推出，盈利未必能夠維持到。」沈大師認為，中新似係一個調整浪後嘅技術反彈，但幅度又未夠三分一，叫周小姐不如等一等先入貨。
今日嘉賓：英皇證券研究部主管沈振盈
每日收市後4:30pm
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
歡迎Phonein28698262
＊以webcam參與節目者，可額外獲贈KFC$100現金券
