港股雖然大部份時間都係在窄幅內上落，但唔經唔覺，又升咗6日，噚日恒指再升465點，期指繼續有百多點高水，H股指數亦進賬445點，成交上番1100億元，大價股繼續有追捧，三四線股仔亦開始有勢。
大市似見底回升
大市好大機會已見底回升，上月22日的低位25861應係底，由11月1日的高位31958起計，下跌6097點，跌幅19%，時間係17日，無論幅度和時間都比7月至8月的調整為大為長。
上月19日，筆者預測今次調整的低位會在26615水平，結果係落到25861才反彈，相差2.83%，在可接受的正負偏差3%範圍內，至於短期上升目標係30000點，相信好快可完成。
上月嘅跌市，共出現3個下跌裂口，第1個係上月2日（31342至30922），第2個係8日（29569至29009），第3個係16日（28730至28120），呢個已回補，恒指噚日最高見29411，第2個裂口亦已補回大部份，好大機會可全部補回。
樓價急升，預期息口又會下調，大地產股紛紛創出新高，新鴻基地產（016）終於見到170元，恒地（012）上到74.85元，信和置業（083）亦重見28.75元。長實（001）同10月底高位159.50元相比，以噚日收市價150.9元計，相差5.4%；九倉（004）收47元，同10月底的50.25元相比，低6.4%，若然真的減息，長實和九倉再創新高唔難。
香港興業（480）高收7.80元，升0.15元，同上月初高價8.68元比較，低10.1%，追落後，此股可考慮。
香港興業由低位6.70元回升到7.92元，之後形成旗形，MACD初現雙牛入貨訊號，若衝破8元，升勢再展，可跟隨先行股創出新高，目標係9元。
土儲夠5年發展
集團現有土地儲備約1000萬平方呎，當中300萬方呎位於大嶼山，包括二白及七白共250萬方呎，另東涌50萬方呎，足夠未來5年發展；另外集團與太古合作於上海靜安區發展綜合項目，樓面有400萬方呎，其他項目亦有數百萬方呎。集團會繼續加強在內地發展，估計明年3、4月間會有公佈。