張梓琳由北京女模一躍成為世界小姐冠軍，來自內地的名模熊黛林直言也曾參加模特兒比賽，但兩次均未能奪冠。姚書軼多次與張梓琳齊踏天橋，她盛讚對方身形、氣度都完美出眾，實至名歸。
名模熊黛林、姚書軼（Mikki）、陳嘉容及Angelababy昨日在中環，為Clarins的化妝比賽任評判。內地女模張梓琳飛上枝頭，登上世界小姐寶座，熊黛林與張梓琳一樣，同樣曾參選內地模特兒比賽，熊黛林卻謂無意參加選美活動，她說：「冇呀，我對選美唔係好有興趣，我𠵱家幾好呀，做model自由度大啲。」她續說：「18歲時，我參加過兩次模特兒比賽，喺廣西同上海都試過，一次攞季軍，一次十佳，但冇拎過冠軍呀。」
增磅漸見成績
問台上可有爭位、批踭等場面？熊黛林笑說：「冇呢啲嘢，嗰時啲女性很清純，我當時已經同𠵱家一樣高。」她又透露努力增磅漸見成績，期待聖誕回南京，大啖媽媽的回鍋肉。
同場的Mikki則謂已學化妝十多年，自誇不比專業化妝師技術遜色，更曾將男友曾智超化做人妖。Mikki曾經與張梓琳行ArmaniPriv囗和Fendi長城騷，她大讚張梓琳身形完美，她說：「我一向要求高，但佢係我見過咁多中國女仔中，身材比例最靚嘅一個。身形夠高，腰短腳長，做過運動員但小腿依然唔粗，線條slim，硬件好完美。」
「幾nice同斯文」
Mikki續說：「同埋平時喺後台傾偈都覺得佢幾nice同斯文，台上又表現好大方，得獎係應該。」問她可有意選美？她笑指自己太老，她說：「內地女仔嘅心態係通過比賽證明實力，𠵱家我工作各方面都OK，唔使再比賽。」
採訪：LawWaiMan、DebbieLum
攝影：ChanChiLam
