港股成交細，大戶挾高插低都好容易，話知你前晚花旗股市下跌，昨日一於砌上去，仲吼住食完晏返嚟，借日股同A股上升挾番個市上去，埋單升咗465點，終於企穩喺29000點樓上收市，下個目標就梗係30000點關。不過，個市仲係有暗湧，可以炒但唔好咁博。
昨日個局都好清楚，好友就掃高啲銀行股，淡友就㩒住啲地產股，不過好多恒指成份股都借勢炒上去，所以淡友都㩒唔住個市，雖然接近30000點關會有好大阻力，但係如果花旗股市昨晚造好，今日個市仲可以挾高啲。
港鐵C輪1250：港鐵（066）昨收27.3元，係兩鐵正式合併之後第一日炒上，大成交高收，睇嚟短線要試30元關，破位睇33元，可以諗吓隻C輪1250，隻輪昨收83仙，槓桿率3.2倍（有效3.1倍），對冲值0.88。
港鐵升上30同33元，1250見1.06元同1.33元，正股跌穿25.2元止蝕。