今年經濟被股市搞到㷫烚烚，搵多咗自然多人趁聖誕出外旅遊消費。噚日華華喺香港上市公司商會活動，見到兩位富豪第二代──小賭王何猷龍同合和（054）胡文新，提到聖誕假期，兩人異口同聲話唔會外遊，胡文新嘅理由係：「經濟好，梗係留喺度做多啲生意。」
難怪得老竇胡應湘睇重，胡文新接手家族生意後，事事親力親為，今年新開咗Emax呢個新場，更要落力留守大本營，搞旺個場。至於小賭王梗係要睇住賭場生意，兩個都話𢱑銀至上，事業為重。
講番香港上市公司商會，兩位公子分擔主席同副主席，第一年搞嘅管治卓越獎噚日舉行，做主席嘅何猷龍特登請賭王老竇何鴻燊嚟，雖則賭王好忙，都專程嚟坐一坐，前後留咗約15分鐘。
咁邊啲上市公司攞獎呢？花旗公司管治卓越獎由新創建（659）、國壽（2628）、瑞安房地產（272）瓜分；評獎委員嘉許由工行（1398）攞到；建行（939）就攞香港上市公司商會及澳洲會計師公會企業社會責任獎。